Құрметті де, қадірлі ата-аналар, ұстаздар, оқушылар және қонақтар

Құрметті де, қадірлі ата-аналар, ұстаздар, оқушылар және қонақтар!

      Қазақстан -  бүгінде өсіп-өркендеген, әлем елдерімен терезесі тең, беделді де, белді ел. «Жақсының жақсылығын айт, нұры тасысын» демекші бұл жетістіктеріміздің бір ұшы қазақ халқының «Бір жағадан бас, бір жеңнен қол шығара» бірлесе еңбек етуінде болса, сол қазақ халқына тоқырау кезеңінде сүйеу болып, ынтымақтастықпен, ымырашылдықпен басын қосып, ел бірлігін ту қылған Абылайхан атамыздай, елімізді бірлік пен бейбітшілікке бастап келген, Елбасымыз тұңғыш президентіміз Н.Ә.Назарбаев ағамыздың ерен еңбегі мен ерлігі десек артық айтпаған болар едік. 

  Тәуелсіздіктің жиырма  жылының ішінде қиын-қыстау қилы  замандарды басынан кешкен Қазақстан  халқының елдігі мен өрлігі  әлем халықтарын таң қалдырады. Тұңғыш елбасымыз Н.Ә.Назарбаев ағамыз салып берген Қазақстандық дамудың сара жолына әлем халықтары қызығуда.

   Бір шаңырақ астында  ұлтаралық, дінаралық келісіммен  өркендеп өсіп келе жатқан  елімнің бұл жетістігі де, тұңғыш президентіміздің соны саясатының арқасында. Қазақстанды мекендеген халықтардың өз ана тілінде емін-еркін қарым-қатынас жасап, білім алуына, өз салт-дәстүрін дәріптеп, ұлттық сана-сезімінде өркендеуіне барлық жағдайлардың жасалуы – бейбітшілік пен ұлтаралық келісімнің кепілі екендігін көрегендікпен болжай білген тұңғыш елбасымыз дана емес пе?! Қазақстандағы дінаралық келісімнің дұрыс жолға қойылғандығының айқын дәлелі Елбасының бастамасымен өтетін Қазақстанды мекендеген әр түрлі дін өкілдерінің бас қосуы айқын дәлел бола алады.

    Қазақстандық  дамудың шырқау биігі 2010 жылдың  желтоқсан айында, Астана қаласында  өткен ЕҚЫҰ-ның Саммиті десек  қателеспейміз. Елу алты елдің  басын қосқан Саммит барысында  Астана декларациясы қабылданды. Бұның өзі әлем елдері алдындағы  Қазақстанның беделі кезекті  бір белеске көтерілгендігін  айғақтайды. Қазақстандық даму жолы  мен бүгінгі тұрмыс-тіршілігіне тамсанып қайтқан әлем халықтарының аузында Қазақстанның шырайлы аты түспей жүргеніне сенімдіміз,

    Тұңғыш президентіміздің салауатты өмір салтын насихаттаудағы үлкен жетістіктерінің бірі Алматы мен Астана қалаларында өткен 7-қысқы Азиада ойындарының өтуі. Қысқы Азия ойындарының олимпиадасын ұйымдастырып өткізу кез-келген Азия елінің қолынан келе бермесі анық. Азиада арқылы Отандық спорттың дамуын жаңа бағытқа бұрдық. Қазақстан жастарын азғындық жолдан бойын аулақ салып, салауатты өмір жолына түсуге бағдарлай білдік.

   Елбасымыздың жыл  сайын Қазақстан халқына арналған  Жолдауы да, халқының қамын ойлаған  ерен азаматтың еңбегі десек  болады. Тұңғыш президентіміздің  Қазақстан халқына Жолдауы, бүтіндей бір елдің жетістіктерін саралай отырып, болашақтағы даму бағыттарына сара жол салып берер Жолдау.

         Елімнің бүгінгі жетістіктері  мен әлем елдері алдындағы  шырайлы атының асқақтауы, біріншіден  ата-бабаларым бас иген елімнің, жерімнің қасиетінде болса, екіншіден  тұңғыш президентіміздің көрегендігі мен даналығында демекпін.  Отаным өрге өрлесін, өрлігі төрге өрлесін демекпін. «Қой үстіне бозторғай жұмыртқалаған заман» елімнің басынан кетпесін. Елім – тыныш, жұртым – аман бола берсін демекпін. Елімнің аты шырайлана, нұрлана берсін, қасиетті жерімнің мәртебесі арта берсін деп тілеймін. Тұңғыш президентіміз Нұрсұлтан Әбішұлы Назарбаев ағамыз айтқандай: «Біз тәуелсіз еліміздің бүгінгі биігінде тұрып осы күнді армандаған бабаларымыздың биік мұраттары алдында, жан алысып, жан беріскен алмағайып замандарда азаттық үшін күрескен аталарымыздың әз аманаты алдында, ел бостандығы жолында құрбан болған есіл ерлеріміздің мәңгі өшпес рухы алдында басымызды иіп, тағзым етеміз»,- дегім келеді.

 Қазақстан еліміздің  Тұңғыш Президенті күні баршаңызға  қайырлы, құтты болсын демекпіз!