Куторкинэнь «Покш ки лангсо умарина» - эрзя - мокшонь литературасонть стихсэ сёрмадозь васенце роман

Рефератось

Курсовой тевесь ашти  36 лопасто.

Тевс нолдазь 26 литературань источникть.

Лувонь валтнэ: СТИХСЭ СЁРМАДОЗЬ РОМАН, ЖАНРА, ОБРАЗНОЙ СИСТЕМАСЬ, ТЕМАСЬ, ИДЕЯСЬ, ПРОБЛЕМАТИКАСЬ.

Ванкшнома объектэсь: Куторкинэнь  «Покш ки лангсо умарина» - эрзя - мокшонь литературасонть стихсэ сёрмадозь васенце роман.

Курсовой тевенть икеле  путовкстнэ:

- ванкшномс А.Д. Куторкинэнь «Покш ки лангсо умарина» - стихсэ сёрмадозь васенце романонть;

- невтемс мокшэрзянь  народонть  исторической  судьбанзо   «Покш  ки  лангсо  умарина»  романсонть;

- романонть  образонзо   ды  художественной  башка   ёнксонзо.

Ванкшнома методтнэ: аналитической  ды описательной.

Получазь результаттнэ: ваннынек А. Куторкинэнь «Покш ки лангсо умарина» - стихсэ сёрмадозь васенце романонть ды панжинек сонзэ художественной башка енксонзо.

Курсовой тевенть лезэзэ: курсовой тевсэнек ваннозь темась лезды  школасо уроконь анокстамсто, рефератонь сёрмадомсто.

 

 

 

 

 

Важодема лувось

 Икельце валось……………………………………………………………………5

1 Мокшэрзянь  народонть   исторической  судьбанзо  невтемась  «Покш  ки  лангсо  умарина»  романсонть…………………………………………………..10

2 Романонть  образонзо   ды  художественной  башка  ёнксонзо……………..16                               2.1 Образной  системась «Покш ки  лангсо  умарина»  романсонть………...16

2.2 «Покш   ки  лангсо  умарина»  романонть  художественной  башка  ёнксонзо……………………………………………………………………….….26

Меельце валось…………………………………………………………………..32

Тевс нолдазь источниктне …………………………………………………...…35

   

 

 

 

 

 

 

 

 

 

 

 

 

 

 

 

 

 

 

 

Икельце  валось

 Мордовиянь  народной  писателенть, республикань  Государственной премиянь  лауреатонть Андрей  Дмитриевич  Куторкинэнь эпической   произведениянзо парсте  содасызь  аволь ансяк минек эрзянь  ды  мокшонь ловныцятне, истя  жо  рузонь  ды  лия кельсэ  кортыцятнеяк.  Сонзэ  книгатне  кармавтыть  тиринь  народонть  кезерень пингест, коест -  кирдаст  содамо [16, 25].

А.Д.Куторкин  чачсь  1906  иень  августонь  25 це  чистэ  Чувашиянь  Порецкой  райононь  Студенец  велесэ  сокицянь-видицянь  семиясо.  Тонавтнесь  Ульяновской  губернской  совпартшколасо,  конань  прядомадо  мейле  роботась  комсомолонь  Телешовской  райкомонь  секретарекс,  партиянь  Порецкой  райкомонь  старшей  пропагандистэкс.

Мейле  сон  роботы  Мордовиянь  Ардатовской  райононь  Жабино  велень  «Рассвет»  колхозонь  васенце  председателекс, райсоветэнь  исполкомонь  секретарекс,   «Эрзянь  коммуна»  газетань  редакторонь  заместителекс,  книжной  издательствань  главной  редакторокс,  «Сятко»  журналонь  редакторокс,  1944 - 1951  иетнестэ  писателень  Союзонь  правлениянь  председателекс.  Косо  бу  аволь  робота  писателесь,  сон  ламо  сермадсь  ды  тонавтнесь  рузонь  классической  ды  мировой  литературанть.

Вишкапингстэ  саезь  ламо  евкст  ды  евтнемат  марсесь  А.Куторкин.  Сон  М.И.Ломшинэнь  евтнесь,  кода  телень  кувака  чокшнестэ  пурнавильть  тенст  шабрань  цератне  карень  кодамо.  Саиль  кедезэнзэ  карь  тетязояк  ды  ушодыль   лецтнеме   бувалань  эрямодонть. Истя  парсте  сонзэ  лисиль, мерят, тетязо  косто-бути  ловны,  аволь  ёвтни. Мейле  кувать а матедевиль  церынесь. Яла  арсесь евтнеманть  эйстэ, кенярдсь,  кода  парось  изнизе  беряненть, лавшось – виевенть. Мейле  Андрей  Дмитриевич  чарькодсь, тетянзо  ёвтнематне  сонзэ  туртов  ульнесть  литературантень  эскельдямонь  васенце  урококс.

Литературной  кизэ  А.Д.Куторкинэнь  ушодовсь  1924  иень  июлень  10-це  чистэ, зярдо  алатырской  уездной  «Трудовой  газетасо»  печатазель  сонзэ  васенце  очеркезэ – «Деревенское». Иень  ютазь  А.Куторкин   кармась  тонавтнеме  Ульяновской  губернской  школасо. Тесэ  сон  сермадсь  зярыя  ёвтнемат, конатне  печатазельть  эрзянь «Якстере  теште»  газетасонть. Рузонь  содавикс  писательницась, Анна  Караваева, ловнызе   Куторкинэнь  «Шалопутный»  ёвтнеманзо, невтинзе  эйсэнзэ  асатыкстнэнь,  целанек жо  шнызе сонзэ.  Сон мерсь,  што эйсэть  ули сермадомань сяткине ды  кемсь:  кирвази покш  толгелькс. Караваева А.Куторкинэнь ёвтнеманть  кучизе  Московов. Курок сон печатазель  од  ломанень  центральной журналсо. Те  седеяк  макссь  творческой  вийть  од  писателентень.

Сон  бажась  тешкстамс  эсь  ёвтнематнесэ, кода  велетнесэ  вансть  тиринь  койтнень-кирдатнень. Од  авторось  ламо  важодсь  эрьва  образонть  лангсо, тонавтнесь  масторонь  покш  писательтнень  пельде. Курок  А.Д.Куторкинэньгак  кеместэ  гайгезевсь  вайгелезэ. Кармасть  лисеме  поэтической,  истяжо  прозаической  произведениянзо [16, 26].

Колоньгеменде  ламо  иень  перть  А.Д.Куторкин  сермадсь  ламо  произведеният. Ютксост  «Вейсэ» ды  «Сиянь  суркс»  поэматне, «Раужо  палмань» (1934), «Ламзурь» (1941), «Покш  ки  лангсо  умарина» (1958), «Лажныця  Сура» (1969)  романтнэ, «Несмеян  ды  Ламзурь» (1962)  оперань  либреттось, ламо  стихотвореният. «Покш  ки  лангсо  умарина»  ды  «Лажныця  Сура» эпопейной  романось  рузонь  кельсэ  нолдазь  Московсо  ды  пачкодсь  минек  масторонь  весе  ловныцятненень [10, 5].

Писателенть  весе  произведениянзо  алтась  эрзятнень  кезерень  эрямонтень, сенень, кода  минек  покштянок-бабанок  бороцясть  эсь  уцяскаст  ды  олячист  кис, кода  кепсить восстаният, рузонь  ды  лия народтнэнь  марто тюрсть  нарьгицяст  каршо [16, 27].

А.Куторкинэнь  «Раужо  палмань» (1934)  романось  васенце  аволь  ансяк  писталенть  творчествасо, но мокшэрзянь  литературасояк. Авторось  бажась  невтемс  эрзятнень рузонь  васенце революциядонть  икеле, революциясонть, империалистической  васенце войнасонть  ды  Советской властенть уставамсто. Нама,  романонть проблематиказо  ульнесь ков седе  келей [10, 6].

Эряви  ёвтамс,  сестэ  кой-кона  критиктне   толковасть: книгасонть  аволь  весе  парсте  удалась  невтемс  персонажтнэнь  потмоёжост, мелест-бажамост. Овсе  истят  критиктнень  марто  а  согласи  эрзянь  писателесь  А.М.Доронин. А.Куторкиндэ  лецтнемасонзо  сон  тешксты: «Те  эрзянь  кельсэ  васенце  роман, косо  эрямось  максови  истямокс, кодамокс  сонзэ  несь  писателесь» [16, 27].

Войнадо  икеле  А.Д.Куторкин  терявты  виензэ  стихотворной  романонь  сермадомасо.  «Ламзурь» - истямо лем  сон  макссь  произведениянтень, кона  алтазь  мокшэрзянь Терюшевской  восстаниянтень. Мордовиянь  содавикс  композиторось  А.Кирюков, те  произведениянть  лангс  нежедезь, сермадсь  1947-це  иестэ «Несмеян  ды  Ламзурь»  васенце  мокшэрзянь  опера [10, 6].

А.Куторкинэнь  творчествасо  покш  изнявксокс  ашти  «Лажныця  Сура» ламо  планонь  эпопейной  романось. Писателесь  трилогиясонть  невтизе  мокшэрзянь  народонть  эрямонзо  XIX  пингстэ саезь XX пингень шкатнес. Романонть домка содержаниязо  максозь сэрей художественной  формасо, секскак сон пек вечкевсь  лвныцятненень, секскак  трилогиясь  совась  мокшэрзянь  литературань  сырнень  фондс [16, 31].

«Покш  ки  лангсо  умарина» стихсэ  сермадозь  романонть  эйсэ писателесь  мокшэрзянь  поэтнэнь  ды  прозаиктнень  эйстэ  васенцекс  невтсь  эпической  образ. Те – Кузай  Мика, конань  эйс  пурназель  пингень  перть  таштазь  тиринь  народонть  мазычизэ  ды  валдо  эрямос  бажамозо [16, 28].

Произведениянть  замыслась, кода  ёвтни  сонсь  авторось, появась  1939  иестэ, но А.Куторкин  сермадомо  ушодсь  сонзэ  ансяк  1946  иестэ. Ниле  иень  ютазь  сон  прядызе  романонть  васенце  вариантонть. Но  авторонть  ульнесть  творческой  ильведевксэнзэ. Московсо  1951 иетэ  ютавтозель  совещания, косо  сынь  ульнесть  витезь.

 Содавикс  критикесь   В.Гоффеншефер  шнызе  поэтэнть  покш  талантонзо ды  мастерстванзо. Сон  кортась,  што  поэтэсь  вадрясто  невти  персонажтнэнь, ломантнень, сехте  пек  сыретнень  ды  эйкакштнень, характеристикаст, произведениясонть  вадря  лиризмась, чевте  юморось  ды  главноесь, вадрят  традициятне. А.Куторкинэнь романсонть  ламо  морот, сказт, легендат, конат молить  фольклоронть  эйстэ, - ды  весе  те  юты романонть келес,  некрасовской стихень, васняяк «Кому на  Руси  жить  хорошо?» произведениянь  традициятнень коряс [18, 95].

Б.Кирюшкин  тешксты: «Покш  ки  лангсо  умаринась» - национальной  произведения. Теде  кортыть  романсонть  невтезь  эрзянь  сюпав  келесь, мордовской народонть  эрямозо  ды  обуцязо, моротне, ёвкстнэ  ды  легендатне, действиятнень  ёвтнемань  народно-поэтической  стилесь, валмеревкстнэ  саезь  фольклорсто. А.Куторкинэнь  произведениясь  кеместэ  сови  минек  национальной  литературань  основной  фондонтень» [18, 112].

Б.Бассаргин  жо  сермады, што  романонть  лангсо авторонтень  эряви  ёще зярыя  роботамс, витемс  кой-кона  асатыкстнэнь. Романсонть  невтезь  ламо  покш  событият, но пек  лавшо  композициясь; кой-кона  событятнень  экшстэ  а  неяви  героесь. Повествованиясь  ламонь  таркава  пек  кувака,  секс  вейкетьстэ  молиця  действиятнень  экшстэ  стака  эрси  неемс,  чарькодемс  ломантнень  характерэст. Произведениясь  сермадозь  аволь  ровнойстэ: веенст  таркатне  парт, виевть, кой-конатне  жо – лавшт. Тень  лангс  апак  вано, эряви  витьстэ  меремс, што  вадрядонть, мазыйденть  романсонть  седе  ламо, чем  берянденть [6, 102].

«Покш  ки  лангсо  умарина» стихсэ сёрмадозь романось, - корты  Г.Кулаков,- кода  покш  художественной  произведения,  теезь  архитектоникань  законтнэнь  коряс.  Сонзэ  эйсэ  ули  формань  ды  содержаниянь  вейке  лув.  Романонть  ловномадо  мейле  сат  мельс,  што А.Д.Куторкин  те  жанрасонть  тейсь  покш  изнявкс,  кона  панжизе  кинть  лия  произведениятненень [21, 68].

Н.В.Зиновьев  арси,  што  эпической  произведениятнень  икелев  аравтозь  пек  покш  эстетической  вешема:  невтемс народонть эрямосто  весе   ёнкстнэнь.  Тень  парсте  топавтызе эрзянь  писателесь  А.Д. Куторкин.

«Покш  ки  лангсо  умарина»  романсонть  народось  невтеви   васенце  страницасто  саезь  произведениянть  прядовомс [16, 29].

Минь  эсенек  курсовой  тевсэнть  седе  домкасто  вансынек  мокшэрзянь  народонть  исторической  судьбанзо  «Покш  ки  лангсо  умарина»  романсонть,  романонть  образонзо  ды  художественной  башка  ёнксонзо. 

 

 

 

 

 

 

 

 

 

 

 

 

 

 

 

 

 

 

 

 

1 Мокшэрзянь  народонть  исторической  судьбанзо  невтемась  «Покш  ки  лангсо  умарина»  романсонть

«Покш  ки  лангсо  умарина»  романось  алтазь  историко-революционной  темантень.  Романсонть  шкась  таргави  ютазь  пингенть  пестэ  рузонь  васенце  революциянтень.  Писателесь  невти: мокшэрзятне  лиякстомить,  ушодсть  арсеме  эсь  стака  уцяскадост  аволь  ансяк  рузонь  социал-демократнэнь  лездамост  вельде.  Сонсь  эрямось,  сюпавтнень  лепштямост,  велень  эрицянть  нужачись  тонавтсь  мокшэрзятнень  арсезевемс  олячис  менемадонть.  Аламонь-аламонь  народось  чарькоди:  эряви  весенень  сыргамс  инязоронть  каршо.  Секскак  самой  большевикень  идеятне  совить  народонь  превс,  кода  шкастонзо каязь модас паро  видьметь [10, 8].

Парсте  кочказь  валсо  ды  художественной  детальсэ  авторось  видестэ  невти - мокшэрзянь  народонть  пек  стака  эрямонзо.  Сокицятне-видицятне  аштить  помещикенть  Пановонь  эйстэ  экономической  пек  покш  зависимостьсэ,  сонзэ  кедьсэ  трудицятне  пек  берянь  условиясо  арендовить  мода [18, 95].

Кежей  пель  прок  тезэ  новольсь

Пек  майсевтиця  Пановось.

Ломанть  пиштевсть  эрьва  кода,

Пешксе  пекень  апак  сода,

Кудонь  уштомс  пенгевтеме,

Карень  кодамс  ленгевтеме.

Текень  тев  нужа  сынст  мерькась [22, 46].

Крестьянтнэ  пандыть  помещикентень  натой  кинть  кисэяк,  кона  юты  сынст  паксятнес  помещикенть  владениятнева [18, 95].

Покш  кинть  образось  истя  жо  тешксты  народонть  уцясканзо,  сонзэ  стакадояк  стака  эрямонзо.  Кувакасто  ламо  янонь  ды  латконь  трокс  таргавсь  те  кись [23, 6].

                        Морыть  нармунть.  Мартост   вейсэ

                        мон  оймсян  экше  сулейсэнть,

                        аштян,  ашо  кев  лангс   озазь,

                        вадря  стулокс  конась  ёзавсь

                        ды  викшневсь чеерень карьксэсь.

                        Истя  гость  примась  умарьксэсь,

                        конань  мазы,  прянзо  алов

                        янт  покш  кистэнть  валозь  валовсть,

                        кутмордамсто  кедекс  васодсть [22, 6].

Покш  кинть  чиресэ  ашти  умарина,  конань  образось  романсонть  невти  эрзянь  народонть  арсеманзо  седе,  кодамокс  эряви  улемс  ломанентень  алкуксонь  эрямосонть [23,  6].

Ульть  лома  мелень  ваныцякс,

ульть  экше  пелень  валыцякс,

ульть  янекс,  кить  якить  ялго,

тон  сех  паро, важов  ялгакс,

тантей  умарень  казицякс,

нучк  седеень  витицякс [22, 7].

Неть  строчкатнесэ  невтезь  важодиця  ломаненть  общественной  тевденть  мелензэ-превензэ. Теке  марто  вейсэ  сынст  эйсэ  ёвтазь  авторонть эстетической  идеалоськак.

Куторкин  невти, кода  трудиця  крестьянтнэнь  граби  велень  мироедэсь  Каргай  Михей  ды  Попов  купецесь, кона  пек  дешовасто  рамси  сынст  пельде  сюронть. Вана  мекс  крестьянтнэ-бедняктне  «иес  кавксть  ярснить  сывельде», пильщикенть  Вардонь  Спирянь  жо  натой  эсензэ  тейтеренть  калмамс «вейкеяк  арась  лазозо, хоть  пильсесь  аволь  аламо».

Седеяк  беряньгадсь  трудовой  крестьянстванть  эрямозо  сюронь  а  чачома  иестэнть. Невтевить  XIX  пингень 90  иетнень  ушодомсто  вачочинь  страшной  картинат:

Пек нусмакадсь  Вечкезь  велесь.

Сы  кувака  пеке  телесь –