Петр Иванович Левчаев – мокшень содаф прозаик

    Шарьхкотьф, сембе ня кизефкснень колга ся пйнгонь литературати ашель мзярда и ашель кода арьсемс. Да и тевське тя, шять, ёфси, эф поэтонь-писателень.

    «Нола»  ломаттне ульсть и улихть, коллективизациясь  синь «крандазснон» касфтозе нинге  сяда пяк, сяс мес, кода сермады Левчаев, «апак лувфоль, кие покась, и изь няев кие нолась. Кие аш, а кие сокась — сембонди ульсь ровна нолась». И сяс поэтсь, бта афкуксонь экономист и «качествань инспектор», корхтай:

                                                     Коса   шинкса  пандыхть питне,,

                                       Тоса тяфта ётнихть шитне.

                                             Коса сделыщинась аф ётайхть,

                                                Тоса  ноласта работайхть. (Левчаев, 1936: 34) 

    Аф  мярьгат, кода поэзиянь ширде, а экономистонь ванфса арьсезь — мяльсь тя видель эста, видекс лядсь тянивок.

    Вов тяфтамоль поэтсь Петр Левчаев — комсь стихотворениянь арторсъ и гулагть комсь кизонь таньфонц варжамда меле литературасонк оцо писателькс араф прозаиксь.

    Петр  Левчаевонь прозанц колга кунара ни и лама серматф. Сонь рассказонзон, повестензон, романонзон  лувихне, лувондсазь-лятфнесазь сатомшка сидеста. «Вирсь увнай», «Повесть и расскаст», «Стярнят-якстернят» и прозаическяй лия произведениянзон и сборниконзон тячи седясазь ламотне.

    И мекпяли мялезель азомс вов мезе: Петр Левчаевонь алува моли стихонь  кярмазонц кочкамста тейне тага лятфтавсть «Даволхт» сборникть ингольдень валстонза арьсематне поэтть ся стихонзон колга, конат «аф юмафтсазь эсь питнеснон». Кой-кона стихнень геройсна 30-це кизотнень лемневсть «кяпе якайхть», «кши сускомонь анцихть» и тяка лаца лия лемса. Сада меде зряфоньке ламода полафтсь. Полафтовсть тяфтама ломаттнень лемсновок, тяни синь вастснон занязь лият. Но смузьсна — сякось лядсь — марстонь паршиень салайхть. Петр Левчаев тя явлениять лемдезе «пянакуд лангса ащезь  эрямакс», тяни кой-коста та явлениясь лемневи «рыночнай реформань эряфс сувафтомакс». Мезе ина тият — пинкне полафтсгь. Но вдь ломатгневок, кода нинге Захар Дорофеев мярьгондсь, — «эсь ёньца кармасть эряма», ушедсть шарьхкодема, коса рынкась, а коса пянакуд лангса ащезь, марстонь паршить салсемац.  

             
 

         3. Мяльхть-арьсемат П.И.Левчаевонь «Кярьмаз» сборниконц колга

    Пётр  Левчаевонь «Кярьмаз» сборникоза сувасть писательть кочкаф произведениянза.

    Тейньк арам, сембе произведениятнень ёткста, конат сувасть «Кярьмазти», сембода удалафсь «Кафонц кудат» повестсь. Сяс сонь ванцаськ сяда цебярняста.

    Повестьса няфневи Анай велень ломаттнень эряфсна  васенце русскяй (1905—1907 кизонь) революцияда  меле, столыпинскяй реформань кизотнень  пингста. Эста вииякшнесть велеса капиталистическяй  элементтне и вишкомкшнесь классовай тюремась. Минь няйсаськ, кода рабочай классть представителенза вятихть велеса агитационнай работа, кепсесазь ашуфнень эсь муцяйснон каршес.

    Ня  тефнень писательсь няфнесыне геройхнень образснон вельде, конат явфт кафта основной лагерьга: фкя ширесот — ведь меленцять азороц, кулаксь Тулаюсь, и перьфканза ащи ломаненза; омба ширесот—трудяй крестьяттне: батраксь Гарой, сонь кельгома стирец Анна, стирть аляц Чилькань Фёдор,   ашусь   Ачур,   рабочайсь-революционерсь Кирей Михалович и ламоц лиятне. Сюжетть юрса Гаройть образоц, конань авторсь тяштезе оцю мяльса. Тя ломанть внешняй портретоцка сёрматф цебярь краскаса: «Самай тя пингть,— сёрмады авторсь,— сувась Гарю. Од картузса, од пиджакса, од кямоса, кудрянза ашкодыхть картуз околышканц перьфке, кода сиянь суркст» (Левчаев, 1972: 193).

    Гаройсь аньцек што сась Нижняйста, коса сон  работась и добувась ярмакт.

    Писательсь  лемнесы сонь ляпоняста «Гарю», кочксесыне лямбонь тии эпитеттнень, сравнениятнень: кудрянза, кода сиянь суркст. Работаф   ярмаконза    сатсть аф аньцек эстеенза щамс-карямс, но и алянцтыге алашань рамамс. Сон ашезе юкста кельгома стиренцка, Аннань, теензовок усксь казнят.

    Гаройсь и Аннась кельгихть фкя-фкянь. Аннась велень стирьхнень ёткса инь удалафсь: «Федянь Аннась стирсь — хоть сельмос шамас, хоть тевс-кис — сисем велева шнама васта!» (Левчав,1972: 153). Сон содасы алянь работатьке: «Мзярс аляц завтракакшнесь  мезе,— сёрмады авторсь,— сон кильдезе алашать и улавти маразень сёрода пяшксе кяскафнень, сонць озась лангозост алянц учема» (Левчаев, 1972: 166).

    Аннань  цебярь характероцка. Сон аф чуван, аф эсь прянь шнафты, сятав стирня. Вов аляц мярьгсь теенза, штоба  сон щаль-каряль сяда цебярняста, но Анна саворне отвечась: «Аф няканян  вдь, аляй: месть няфнемс пря!» (Левчаев, 1972: 168).

    Но  сюжетти шоворькшнихть лия тефт. «Сембе содасазь,— сёрмады авторсь,—  тячи-ванды срхкси кудалама Тулаюське, конань Яку «цёранц... аф ламода аф сатнихть прясонза, велеса-сядоса кургс путыец аш» (Левчаев,1972: 153).

    Сяконь  лангс Аннать аляц, «Федорсь салава кирдсь мяль хоть фкя куцеманяда маладомс Тулаюти Анна стиренц вельде». Сяс сон и срхкась меленцяв, «мяльсонзоль няфтемс ломань ёткса, кодама шачф-удалаф сонь фкяняц-ажаняц и сияк саламс азоронц   мялензон-арьсеманзон»   (Левчаев, 1972: 167).

    П. Левчаев эрекста и видеста, историческяй тевса-киса няфнесы сире пингонь эряфть и сянь, кода сяськихть од вийхне. И тя тевсь моли оцязоронь властть пингста, мзярда Анай велень эряйхне ульсть пяк шобдат и сембода пелендсть.

    Од  вийхне сяськихть кода личнай, стане  и общественнай эряфса. Тяса эряви азомс, што П. Левчаев маштозь сотнесыне повестть сюжетсонза личнай и социальнай тефнень, вятьсыне синь фкя-фкянь эзда апак явошнек.

    Васенда марявсь, бта сире коень кирдихне   сяськихть.   Но од   ломаттне аф пелихть ни козялятнень эзда и смелста молихть каршезост. Вов Тулаюфне срхкасть Аннань кудалама. И Анна тонафтозе Гаройнь, кельгома цёранц, мезе тиемс: «А вов кода, Гарю,— кенордазь и псиста тошказевсь Аннась,— синь мяльсна самс недляшинь илядня — сак тонга! Лангозост: Синь каяйхть той оцю, тон аст сяда оцю» (Левчапев, 1972: 199).

    Синь  тяфта и тисть. Аф стак Гаройть  кресналяц Андрей Иванович мярьгсь: «Узерень кеподемс шуфтсь касы... Тяса пелемась и учсемась аф ялгат!» (Левчаев, 1972: 213).

    Тянь  шназе Тулають рабочаецка — революционерка, Кирей Михайлович, конанди Гаройсь и Андрей Иванович якасть советонкса.

    Но  пингсь эста стамоль, и кудаламста сяда оцю той каясь Тулаюсь. Но Анна сякокс ашезь макса пря:

    «Вов  кельгомазе, вов, ваность! Ванода сембе!»

    Сон сембонь ингольде палазе Гаройть и кархцадезе кенкшть, прафтсь шобда ульцяти.  Гаройсь ёрдазь ёрдавсь мельганза.

    Вальмава  народсь рёвакодсь: кивок тяфтаматефт  нинге изьняенде!» (Левчаев, 1972: 251).

    Тяда  меле Гаройсь и Аннась арьсесть тумс велеста. Но Гаройсь арась ни аф стама  ломанькс, штоба эсь павазонц инкса юкстамс общественнай тевть. «Гаройсь,— сёрмады писательсь,— соньцке туль хоть тяникиге, ворьготьфтелезе эсь кельгоманц тя маластонга, аралалезе, кда аф ся тевсь, кона пичетьфтезе марнек велеть, кона ашель кода кадомс апак тихть,— тяка Тулають кядьста перень полатнень араламасна. Сон сонць ломаттнень корхнезень Тулають кинц лангс арама, сонць кошярязень мархтонза тюрема и теенза тяни визьксоль арамс эздодост бокс али кадомс ськамост. Аф, сон тяфта аф тии: народть, ашу ломаттнень павазсна сяда питни эсь павазонц коряс» (Левчаев, 1972: 277).

    Тяфта минь пачкодеме сюжетть ся вастонцты, мзярда эряви ётамс омбоце рашконц  ванондома, кода писательсь панчсесы социальнай конфликтть.

    Кулаксь-мироедсь Тулаюсь — «сисем-кафкса велеста сембода козя ломанць»— столыпинскяй реформать пингста арьсесь эстеенза керомс ведь меленцянц перьфке ащи общиннай модать, но трудяй крестьяттне кеподсть каршезонза, плхтазь Тулають кудонц и меленцянц.

    Тееньк-арам, П. Левчаев арась мордовскяй литератураса стама писателькс, кона 30-це кизотнень пингста ушедозе историческяй повестень жанрать. «Кафонц кудат» повестсь няфнесы, што тя жанраса П. Левчаев сёрмады, кода социалистическяй реализмань художник.

    Мокшень шобда велень ашу крестьяттне аф курок пачкодсть сянди, штоба кеподемс восстания эксплуататорхнень и оцязоронь властть представителензон каршес. Тянди лездсть, кода няфневи повестьса, кафта туфталхт:

      1) ломаттнень пяк стака эряфсна и;

     2) ашу крестьяттнень ёткса революционерхнень  работасна.

    Вов кодама стака эряфс и шобдас пачфтезень мокша велень эряйхнень   кафтонь крдань, социальнай и национальнай, люпштамась: «Сире Кужень эряйхне эрясть-ащесть синць, шкайда, попта, старостада, воражьядонга пелендезь; пелендсть синь вирявадонга, ведявадонга, атямдонга, ёндолдонга, пиземдонга, манидонга, ковдонга, шидонга. Шять, лама сяда киза эрясть тяфта — лакасть эсь ямсост...»   (Левчаев, 1072: 166). 

    Тя  шобдашить касфнесазь сире койхне, ся пингонь эряфть-ащефть ванфтомац.

    Эряви азомс, што П. Левчаев ульсь мокшэрзянь ся писательхнень ёткса, конат лац  содасазь сире койхнень и маштозь  сявондьсазь эсь произведениязост, лиякс мярьгомс, няфнесазь аньцек эста, мзярда афкукс эрявихть, кда синь лездыхть геройхнень характерснон панжемс. Сяс писательсь няфнесыне аф аньцек велень эряфть кальдяв ширензон, но и мокшень национальнай цебярь койхнень. Вов Гаройсь сувась Ачур кресналянц пяли.

    «Лаподезень кядензон креснавацка, нардазе акша килеса тяфтаконга тюжаняс штаф скомнять, путсь куцю»  (Левчаев, 1972: 204).

    Мокшень койть тя детальняц сявф аньцек сянкса, штоба максомс национальнай характеристика Ачурть рьванцты. Сон работань кельги, лац тиендьсыне кудъёткоиь тефнень, кенярди инжити.

    Тяни ванцаськ, кода касондсь мокша велень сокай ломаттнень сознаниясна, кода теест пачкотькшнесть революционнай мяльхне.

    Революционнай мяльхнень, странаса моли общественнай тефнень крестьяттненди азонкшнезень Кирей Михайлович, кона ётась оцю революционнай школа — ульсь Питерса, Нижняй Новгородса, а тяза сась Ташинаста. Штоба улемс крестьяттнень ёткса, сиводсь работама Тулаюти, арась меленцязонза машинистокс.

    Вов кода сёрмады колганза сонць авторсь: «Лияста, коса сяда лама ломаньда, нажади панарнек-мезнек, сельмопонанек почфу  аля — Тулають работникоц. Ломаттне содасазь сонь и кельгсазь ни, хоть и тихтедсь сей аф кунара. Якай — фалу нозы сиянь пинкскаса пинготьф трубканц, конань тарксесы кургстонза кда аньцек ярхцамста... Мезе кельк тии и аф оцю питнеда. Тянкса и кирдьсы сонь Тулаюсь, кирдьсы коронц, аф няи книжканзон и листовканзон шири, конатнснь аф весть сторожсь, фкя сельме Миронць, мушендозень кошкастонза. Лиясь тянкса волостнойти пачфтель, а Тулають пряса кой-мезе ули: азонтк волостнойти, и сявсы келдань куду. А кие эста кармай тиендемонза тя сембе мудрёнай тевть?» (Левчаев, 1972: 155 ), лиякс мярьгомс, меленцяса тефнень.

    Тя  весяла алять кельгсазь ашуфне, эрь мезне якайхть теенза советонкса. И сон сембонди лезды валса и тевса и сяка ёткова вяти политический агитация оцязорть каршес. Кирей Михайлович корхтай Ачурти: «Кеподендяряль народсь — оцязорське афоль сударда... Да, оцязорсь—вий, но модать лангса азорхне — минь, народсь» (Левчаев,1972: 217).

    И ня революционнай мяльхне пачкодихть велень ашу ломаттненди. Сембода  инголи   кармась    синь    содамост   Гаройсь.

    Сон целай колма кизот ётась революционнай школа нижегородскяй рабочайхнень ёткса. Сембода оцю лезкс тя тевса Гаройти тись университетста паньф студентсь, революционерсь Добронравов, сон сявондезе мокшень цёрать рабочайхнень  сходказост.

    Гаройсь, кодак мрдась эсь велезост, повсь ся ломаттнень ёткс, конат анокласть восстания эксплуататорть Тулають каршес.

    Повестть сюжетса социальнай и личнай тефне маштозь сотфт фкя-фкянь мархта Гаройть образонц вельде. Сонь мельганза «народсь, бта сязьф прудста ведсь, комболгодсь: кеподсь седиень калафты шум, рёвф, ламонц кядьс тихтедсть пяльхть, ажият, руцягат. Волостнойсь юксозе тройканц, комотсь крандаскяти и тусь шанчк. Земдемерсь да Тулаюсь комотсть мельганза...»   (Левчаев, 1972: 290).

    Советскяй литератураса историческяй жанрать традициянзон мельге молезь, П. Левчаев макссы произведениянц пенц стане, што сон пяшксе историческяй шивалдта, сянди верондамада, што народсь курок прокс сяськсыне эсь врагонзон. Тянкса маштозь сотнесы природань картинатьке. Восстанияда меле Гаройсь алянц мархта корхнемста мярьгсь: «Буря кеподи! — чипордась теенза цёрац.— Курок, аляй, курок кеподи!