Петр Иванович Левчаев – мокшень содаф прозаик

    Шопотькшнесь  ни, мзярда синь кепотьф мяльса тусть  куд шири. А ве лангс, афкукс, вачкодсь вишке пизем, валсь веньберьф, бта  кошартф, бта кенордась штамс модать соду шаманц. Лоткась аньцек варьхмодеманц ланга» (Левчаев, 1972: 293).

    Кодак аделавсь восстаниясь, велень ялганза  и аляц мярьгсть Гаройти тумс велеста. Гаройсь азозе тянь Аннанди, стирсь кенярдсь, мес кельгома цёрац сявсы эсь мархтонза.

    Сяда  тов авторсь стане сёрмадсы природать, што ся лезды сяда лац шарьхкодемс, мезе палы Гаройть и Аннать седиса-ваймоса. «Синь инголест валомне ляксесь  сетьмоф ни Валда ляйсь, удомбачк тошксесть нюдиксне — тяни ашель  ни синь тошкеемаснон паннисна: меленцясь сетьмось прокс.

    — Пандозь прорвать кргапаренц! —мярьгсь Гаройсь.— Тяфта сон и эрявсь!

    Велеть  ширеса кукорязевсь атёкш, и синь мекольцеда варжакстсть шачема-касома велеснон лангс. Вирьхнень, кели паксятнень вельксс крьвязькшнесь шобдавань  зарянясь. Гаройсь тага кемоста люпштазень Аннать кядензон, мярьгсь:

    — Варьхмотькшни, Аню, од ши васьфнесамазь тя оцю кить лангса!» (Левчаев, 1972: 293).

    Тяфта цебярь эряфонь учезь историческяй ши валдса аделави П. Левчаевонь «Кафонц кудат» повестец, тяфта марс сотфста решандавихть сонь социальнай и личнай конфликтонза. Тя корхтай удалафста тиф произведениять композициянц и лац моли сюжетонц колга.

    Геройхнень  характерснон сёрмадомста П. Левчаев  вешендьсыне ся художественнай средстватнень, конат тя пингоня эрявихть. Эрь ванцаськ, кодамоль Ляксей атянь потмаёжец, мзярда цёрац мрдась Нижняйста.

    «Ляксей атя,— сёрмады авторсь,— изь  матодовкшне. Васенда, кодак тусь ульцяв цёрац, бта велякшнесь, но срхкасть-кеподсть, кода удалаф шапакс, арьсеманза-мяленза и кеподезь соньге». А сяда тов туйхть ни, кода внутренняй монолог, атять арьсеманза: «Цёрац сась!— арьси Ляксей атя.— Шумбра-пара! Кандсь ярмак мар! Орёл и орёл! Кинь нинге ули тяфтама цёрац?»  (Левчаев, 1972: 199).

    П. Левчаев эрь мезне тиеньдсы сянь, штоба психологическяй анализсь стаки вишкомоль, пакшень-пакш панжелезе персонажть ваймонц. «Сиренясь стясь, типольгодсь шкай уженяти, сатозе стака кошелекть, сявозе кафцьке кядезонза — ваны лангозонза: панжемс, аф? Ваномс, аф ярмакнень? Шта кодапт? Мзяра? Крестондась — панжезе и абондсь: сиянь цалковайхть! Што мзяра? Шкай содасы! Лама! Шять, саты алашандинге, траксондинге! Сонць содасы, шять, копоренц ланга ливозькс шудесть! Трёшниконянь самс лувфт: Но сяка пяярдезень моркшть лангс, кармась лувомост. Лама! Эк, педсь педлись: «Козякофтте!» (Левчаев, 1972: 200). Тяфта Ляксей атя арьси ни Тулають колга, кона ярмак лангс вешсь, штоба Гаройсь атказаль Аннань эзда.

    Кода  няйсаськ, тяса аф стак коль сяда сидеста авторти сашендови путнемс кизефтемань, серьгядемань знакт. Тя сяс, мес Ляксей атянь ваймоса мяльхне ласькозь ласькихть — фкясь омбоцеть мельге. И тага Ляксей атянь арьсеманза: «А вов сон, козяшись! Цёранц верса-ливозьса добуваф!»

    Пара  ся, што П. Левчаевонь произведеииянзон козя кяльсна, кода сонцень авторть  — повествовательть, стане и персонашнень кяльсна.

    «Кафонц кудат» повестьса маряви стильть  мокшень таньфоц, кона тиендеви и  фразать строенц вельде, и народнай кяльста сявф изобразительнай средстватнень: валмуворкснень, эпитеттнень, сравнениятнень, метафоратнень, гиперболатнень вельде.

    Вов кода авторсь азондсыне Гаройть  арьсеманзон: «Сон содалезе крёсналянц: велеса-сядоса кургс кундама ломань, вал азы — мокорь лазы» (Левчаев, 1972: 203).

    Тяса  фкя предложенияса и образнай вал, кона тиф кафтста — «велеса-сядоса», и метафора —«кургс кундама ломань», и валмуворкс —«вал  азы — мокорь лазы».

    Кой-коса П. Левчаев сявонди валхт рузонь кяльстовок: ступай, ласковай, живойста. Тя лезды писательти сяда цебярьста  няфтемс геройхнень  характерснон.

    Персонажть  няфтемста авторсь маштозь кочксесыне мокшень народнай кяльста сявф сравнениятнень. Вага Тулають рьванц «катоннетнень кодяма пиндолгодсть сельмонза» (Левчаев, 1972: 241). А. Тулають колга писательсь сёрмады: «кода врьгаз». А вага кода няфтеви Тулаюсь, мзярда сон ащи кенярдезь: «Удерязень штыкокс ащи усанзон. Сонь шамац да сялдазоц якстерьгодсть, кода алыяй саразонь, а шалхкоц арась борзи (якстерь перец)  лаца...» (Левчаев, 1972: 171)

    Ёфси  лия сравненият сявонди авторсь  трудяй ломаттнень характерснон няфтемста. Вов Ачур бедняксь, кда пшкяди, «бта доскас эска шави, бта шочкс шапа тии» (Левчаев, 1972: 158). Лац азовсь народть аф сяськови виец тяфтама сравнениять вельде: «И народсь, кода сязьф прудста ведьсь, комболгодсь...» (Левчаев, 1972: 290).

    Повестть  кялец няфнесы, што П. Левчаев  моли ся цебярь традициять мельге, кона ладявсь историческяй жанраса,— тя жанрань произведениять кялец улеза стама, кода корхнесть ся пингста, мзярда моли действиясь, но сон шарьхкодевоза тяниень лувити.

    П. Левчаев, мзярда эряви, сявондьсьше  мокшень фольклорста цебярь изобразительнай средстватнень. Вов састь кудалама. И Анна ольксезь-авардезь, ёфси кода мокшень свадьбань мороса, корхтай   алянцты:

    «—  Алянякай-кормилецкяй, алякай-шивалдоняй, инголет касыне серезень — ашине  куленде осал валняцень. Тяни срхкать  максомон — пеельфтома печкомон... Печкомс ина печкомак, аньцек оржа пеельса, максомс ина максомак, аньцек вов тя ломанти!» (Левчаев, 1972: 248) .

    «Кафонц кудат» повестть идейно-художественнай цябярь ширензон колга корхтамста сави лятфтамс сявок, што эсонза васьфневихть аф удалаф васттка.

    Васенда лоткатама творческяй афсатыкснень лангс.

    Содаф, што произведениянь сёрмадомста  писательть-реалистть ули стама  правац, конанди литературань теорияса мярьгихть «всеведения»— сембонь  содамац. Тя законць корхтай сянь колга, што валонь художникти эряви содамс сембось, мезе тиендеви произведениясонза. Но П. Левчаев фкя вастса няфнесы тевть стане, бта аф содасы, мезень али кинь колга корхтайхть. Вов Гаройсь корхни Ачур крёсналянц мархта, штоба ся афоль веронда оцязорти и тошказь азозе, кие ся ёню ломанць, кона ня мяльхнень пачфтезень теенза. Повестьса тянь колга луфтама: «Гаройсь тошкась кати-мезе, и ся панжезень сельмонзон келесост»  (Левчаев, 1972: 207).

    Тяса  кивок аф содасы, кие ся ломанць, кона тонафтозе Гаройть, штоба афоль  веронда оцязорти. Реалистическяй произведенияти тя аф ладяй.

    Нинге сяда кальдяв ся, што П. Левчаевонь повестьсонза васьфневихть физиологический натурализмань сценат, конат аньцек колсезь произведениять мазышинц (Левчаев, 1972: 236).

    «Кафонц кудат» повестьса ули васта, коса цебярь мяльса аньцек азф, а геройхнень тевсост васта аф мушенды. Кирей Михайлович лятфтазе Ачурти народнай валмуворксть: «Вете сурста лиси клок». Тянь вельде азф повестть идеяц: народть виец — марс пуромомаса. Но повестьса тя аф пяк няеви.

    Досадна сявок, што мельцек моли кафта  страницаса Гаройть колга азф  фкя-тяка валхне: «Сери, кода пиче, акша, кода калаця».

      «Кярьмаз» сборникти кочкаф оцю произведениятнень тематикасна.

    Писательсь  «Ушеткс» книгастонза сявозе «Мувору» рассказонц, коса тевсь моли колхоснень тиемста. Аньцек стака шарьхкодемс, мезенкса Яку кулакть инголе «мувору» Васька бедняксь: кати сяс, мес васенцесь сувась колхозу, али сяс, мес траксоц пяк ни лофцу.

    «Кяж» повестьса сявф стама васта, коса азондови, кода коллективизициять пингста шорсесть «шкаень ломаттне», монашкатне-месне од эряфонь тиихненди.

    Авторсь сувафтсь и «Сяпи шит» книгастонза пакш «Инголи, инголи» лем ала. Но апак аст аф ся, кодама произведенияста сявф, и афи шарьхкодеви, коза афкукс терди пакшть лемоц. Пади, авторсь тяфта лемдзе сяс, мес главнай геройсь Антошась тусь велеста идень куду. Но сембе сяка тя пакшть, кода и «Мувору» рассказть, лемоц аф удалаф.

    Геройхнень  классовай ширде карань-каршек ащемасна и сюжетть оржа драматизмац —  П. Левчаевонь творчестванц ня главнай чертанза—лац няевихть «Вирсь увнай» повестьсонза, кона сявф «Расскаст» книгастонза. Повестьса няфневихть ся тефне, конат афкукс ульсть Темниковскяй и Зубо-во-Полянскяй вирьхнень зса Советскяй властть васенце кизонзон пингста, мзярда мольсь гражданскяй войнась. Минь няйсаськ, кода кулацко-бандитскяй элементтне тяряфнесть тюремс Советскяй властть каршес, но теест ашель кинь лангс нежедемс. Тянкса срады-калады Панкратонь бандитонь шайкац.

    Авторсь сёрмадозе коммунистть, велень Советть  председателенц Офтайкин Андронть мяляфтови образонц, кона эсь мельганза вятезень велень ашуфнень бандать машфтома.

    Тяка  книгаста «Кярьмазти» сявф «Вармась сетьмось» рассказсь, конань аш кода шнамс. Рассказса мокшень ават. Синь пачкодсть машина кинь станцияв, а ков молихть, местема — аф шарьхкодеви. Тя произведенияса геройхнень тевсна-кисна аньцек азфт, сяс аф шарьхкодеви рассказть лемоцка.

    «Расскаст»  книгаста сявф и «Культурнай цёрась», конань авторсь лемдезе «юморескакс». Но юмореска ашезь лисе. Цёрать кучезь работама вели, а сонь аш мялец тумс ошста. Но рахсефти тефт рассказса аш.

    Юмореска  лангс шары «Ялгат» рассказсь, кона, улема, сёрматф Н. В. Гоголень «Кода  сялондсть Иван Иванович и Иван Никифорович» повестенц эзда тонафнезь. «Ялгат»  рассказть героензон аньцек кавычкаса  можнат лемдемс    «ялгакс», сяс   мес   синь аньцек сяконь    тиендихть,    што    васькафнихть фкя-фкянь.

    Природаста  цебярь картина максф «Ласкань седи»  аф оцю рассказса. Сонь пара  мяльса лувсазь оцюфневок,  иттневок.

    Цебярь  пакш сявф «Стирнят-якстернят» романцта. Тяса няфневихть Сире Кужень лугатнень мазышисна, колхозникнень вишке тевсна, советскяй ломаттнень пара ялгань ваймосна.

    «Аляшка цёрокш» повестьста писательсь сявсь  пакш, коса азондови, кода велеса эряй Антоша цёранясь, кона касы аляфтома. Минь няйсаськ, конашкава пара сонь ваймоц. Антошась тусь тядянц мельге, кона нусь козялянь паксяса розь. Сяс мес цёрокшсь ульсь вачеда, салазе кшить, конань аноклазе азоравась нуйхнень андомс. Антоша арьсезевсь: тядяцка, лия работай аватневок сонь сюнедонза лядыхть вачеда, и сон максозе кшить меки.

    «Повестть. Расскаст» книгаста сувась «Пичетне пичедихть» повестсь, коса азондови мокшень семьянь колга. Тевсь моли революцияда инголе Зубувонь вирьхнень эса. Повестьса сюжетсь вишке и оржа. Геройхне ашихть карань-каршек. Фкя ширеса—лесопильнай заводть азороц Модзалевский; сон визьксфтома, аеркс ломань. Васькафтозе мазы стирть Наташать, тиезе любовницакс. А мзярда ся шачфтсь, панезе соньге и алянцка артельщик вастста. И тя семьясь срадсь-каладсь: Фана атя и сонь рьвац кулость, Наташа повазе эсь прянц. Но сазороц Уляшась и сонь женихоц Андрей кармасть кяжень пандома: синь шавозь Модзалевский  лесозаводчикть.

    «Кярьмазсь» аделави аф оцю пакшкаса, кона сявф «Золотань калня»  книгаста. Тя пакшкясь нолдаф «Удалаза кинте!» лем ала. Эздонза няйсаськ Енисейскяй Заполярьять природанц мазы картинанц. Рассказсь пяшксе лиризмада, и марясаськ, кода авторсь лажадсь эсь Мордовиянцты. Сон мярьгсь акша локстихненьди, конат ащесть ёфси каршесонза: «Удалаза кинте!— ювадень мельгаст.— Токаттяда лиемда шачема-касома Мордовиязень вельфке — азода монь эздон седи ваксстонь пара вал». 

                                                      
 
 

                                               
 
 

                                                Мекольдень вал

    Мекольдень кизотнень мокшень литератураса васенце вастть занязе прозась. Эвондасть повесть и роматт. И вов тя жанраса варжазень эсь виийнзон и Петр Левчаев.

    Писательть  лама повестензон и азксонзон  эса эряйхть-ащихть, арьсихть и пачкотькшнихть павазти разнай ломатть профессияс, общественнай положенияс и характерс коре. Но писательть фалу таколфнесы ломанть мазышиц, сонь козя седиец-ваймоц, эряфонь кельгомац. Писательсь пяк ёрай, штоба минь ломаненьке, коса афольхть уле, мзярдонга афолезь юксне альнякакс-браткс тиендемать, лезнельхть фкя-фкянди.

    Петр  Левчаевонь повествованияц выразительнай, точнай и ёмкай. Кялец-валоц сонь кой-койста малаткшни драматическяй произведениянь кяльти: кржа валдонза, но сянь,  мезе азф, оцю смысловой нагрузкац. Интонацияс коре писательть повествованияц моли седиста-ваймоста, пяк лиричнай. Сяс сонь прозац можна лувомс лирическяйкс.

    Писательсь  лац марясы родной кяльть-валть, и  повествованиянц мольфтьсы эсь  народонц кялень-валонь стройнц закономерностензон коряс. Тя няеви аф аньцек определеннай рисункаста, но и малацекс ащи валнятьнень эздонга, конат лездыхть сядонга лац мыслять азоманцты. Кепотьксонди, кда мярьгомс «Антошкась кассь», то можна шарькодемс, бта Антошкась кассь аньцек серес. А писательти эряви азомс, што сон кассь и сяда кемокстась, и штоба лац азомс тя мяльть, сон нолясыне тевс малацек ащи валнятнень: «кассь-кеподсь».