Куторкинэнь «Покш ки лангсо умарина» - эрзя - мокшонь литературасонть стихсэ сёрмадозь васенце роман

Вечкезь  велесь  пек  потмура,

Ламо  кудот  овсе  чавот.

Вальмаст  лазонь  крестсо  чавозь

       Исторической  эрямонь  виев  контрастнэнь  А.Куторкин  невти  драматической  картинасо. Вана  Панов  помещикесь  лембестэ  мурни  аволь  опытной  церанзо, тонавты  эрямо. Свадьбань  путешествияв  ильтямсто  Панов  корты  цёранстэнь  ды  урьванстэнь:

- Ну,  то-то  пижеть

од  ломантне. Марш  Парижев!

Бедной  крестьянинэнть  Кузай  Яковонь  семиясонть  жо  тердить  эйкакштнень  чевгень  куслядо  ярсамо  истямо  валсо:

- Эрде, садо,

цислань  кисэ  хоть, ярсадо.

Кода  несынек, васенце  страницасто  саезь  меельцес, А.Д.Куторкин  невти  народонть. Ломантнень  эрямодост  картинатне  невтить  эпически  келейстэ. Минь  несынек  васня  Вечкезь  велень  эрицятнень  историянь  кинть  ланга  кеместэ  эскелямсто. Теке  марто  вейсэ  поэтэсь  сюжетной  линиятнень, событиятнень  ды  художественной  картинатнень  вельде  келейгавты  ёвтнема  лувонть: кортамось  сови  Сырезь  велень  рузтнэде, лецтявить  Петербургонь   робочейтне, ламо  ломанть  невтевить  Саровской  Монастырев  инязоронть  само  шкасто.

Лиякс  меремс,  романонть  сюжетэзэ  таргави  ламо  рядсо  ды  сынь  весе  сюлмавозь  вейс  сень  кис, штобу  художественна  седе  домкасто  панжомс  народонть  эрямонзо [23, 50].

Ламо  тарка  романсонть  зани  ярмункань  невтемась, косо  авторось  парсте  невтизе  весе  народонть: и  сюпавтнэнь, и  нужатнень. Алкукскак, те  картинась  мерят  артозь  живописецэнь  кедьсэ. Сонзэ  тюсстнэ  пурназь-теезь  маштозь: моли  авторонть  пельде  кортамо. Неят  эрьва  кодамо  тюсст, ламонь  кортамот, редявикс  валт, друк  появиця  ды  апак  фатя  ёмиця  персонажт, шалт, иредезь  ломанень  кортамот  ды  лият.

Ярмункантень  пуромсть  маласто  велетнестэ  ды  оштнестэ  рузт, мокшэрзят, татарт, чувашт, цыгант, - мерят  таркантень  пуромсть  ламонациональной  Россиянь  весе  раськесь, ды  тесэ  невтеви  весе  сюпавчизэ  ды  нужачизэ.

Социальной  авейкетьксчинть  писателесь  ливти   лангс, сон  ярмунканть  невтемсэ  васень  таркасо. Попов  купецесь  теке «почтонь  инязор», Сытинэнь  книганзо, суконной  фабрикантонть  певтеме  рядось, конезаводчикень  алашаст – весе  те  сявады  сельме, савты  кеж  беднойтнень.

Ярмункадо  главасонть  улить  истят  таркат, конатнень  пек  домка  смустесь, сынь  чарькодевить  эрямонь  сехте  апак  учонь  ёнкстнэнь. Вана  Вечкезь  велень  Наво церантень  пижни  вейке  микшниця:

Ве  купецесь  мурдавты  Навонь:

- Стой, шальной бездельник!

Ну на что  похоже, право:

соску  взял  без  денег.

Пейдемань  тевть  лиснить  теке  тев, сынь  тешкстыть: велень  ломанесь  ламонть  а  соды, манявкшны,  ялатеке пеедькшни  сень  лангсо,   ки  сондензэ   седе  покш  нужасо  эри  ды  аволь  ежов. Мезе  ашти  ансяк вана те  таркась, конань  писателесь, мерят, апак  витне  саизе  эрямостонть  ды  совавтызе  ёвтнема  лувонтень:

- Монь  рамамс  ульнесель  мелем,

но  зепем  а  мери.

Эрьва  ков  мондень  икеле

арасьчись    кенери.

Эрьва  мезе,  неят,  ули,

Но  аволь  миненек [22, 98].

Вети  писателесь  ловныцянть  мельганзо  ды  невти  тензэ  тень-тонань. Теке  живой, друк  лиси  икелеть  пенчень  микшницясь, кона  истя уш  шны  миемапелензэ, истя  уш  бажи  миемс  сонзэ,  мик  а  кода  а  рамамс  пенченть [10, 17].

Сюпавонть  нинзэ –  Каргай  Родянь  авась, мерят,  стяконь  тев  теи: сими  позадо. Но  писателесь  тесэяк  муи  истямо  пшти  тешкс,  конань  вельде  кода-бути  сеске  ливтьсы  лангс  аванть  а  превейстэ  прянь  ветямонзо.

Ярмункань  неть  картинатне  вадрясто  невтить  обществасо  социальной  эрямонь  авейкетьксчинть.

Тень  панжомасо  идейной  покш  смусть  канды  Маскань  – циркень  профессиональной  борецэнть – марто  Микань  пелькстамось. Микань  кис  аштить  трудиця  ломантне, Маскань  кис – сюпавонь семиянь  зярыя  ломанть. Тень  вельде  поэтэсь  панжи  васенце  революциядо  икеле  вийтнень  явомаст. Весе  те  видестэ  корты  седе, што  инязоронь  пингстэ стака  эрямонть  лангс  апак  вано, народось  ванстызе  нравственной  ды физической  виензэ [23, 53].

Романонть  ушодомсто  народось  невтеви  национальной  койтнень-кирдатнень  ванстыцякс. Тесэ  ловныцясь  вастови  Роштувань  сочельникенть, Калядань, тундонь  ды  кизэнь  вастомань  ды  ильтемань  койтнень  марто. Седе  тов  минь  нетяно  кода  аламонь-аламонь  касы  народонть  национальной  самосознаниязо, кода  сон  тееви  революциянь  ютавтыця  виекс, кода  карми  чарькодеме  тюреманть  смустензэ. Васенце  эскельксэкс  видечинть вешнемстэ  ульнесь  стихийной  выступлениятне. Сокицятне-видицятне весе  вейсэ,  Панов марто апак  соглася,  лиссть  пинементь ледеме. Авторось  образнойстэ невти народонть виензэ, кода  сон дружнасто кундась эсензэ  лангс роботамо:

Кичкерне  луганть  кувалт,

мерят, вармасо  пувазь,

ве  рядсо  церат  молить,

мазыйстэ  сынь  аволить,

а  милесэ  миледить –

вейсэ  тикше  сынь ледить [22, 190].

Народось  а  кирди  эсь  потсо  валтнэнь, конат  таштавсть  эрямонть  перть  нарьгицятнень  лангс.  Лебонь  Иван  видестэ  мерсь  Калкинэнь  пижнеманзо  каршо: «Оргодтя, зярс  прят  цела, мольдянок  ней  минь  ве  лангс». Бедной  Нужань  Савконь  образонть  вельде  авторось  невти  народонть  пазнэнь  озныцятненень  а  кемеманзо. Истя, Савко  эзь  карма  кавтолдомо  отец  Уваронь  икеле, зярдо «пазонь»  ломанесь  кармавтсь  эйсэнзэ  пачтемс  кулят  революционной  кружоконь  тевтнеде. Сонзэ  эзть  сявадо  сельмензэ  попонть  алтазь  ярмактнень  лангс:

- Отец  Увар, минь  вачо, кепе,  штапо,

нищейненьгак  а  мейс  тезэ  совамс,

но  уш  мезе  седейнек  стенас чапозь,-

иредезьгак  а  микшнетяно  сень [22, 198].

Кода  минь  уже  кортынек, народонть  образозо  невтеви  васенце  страницасто  саезь  меельцес. Авторось  невтизе, кода  народось  полавтызе  весе  эсензэ  эрямонзо. Олячис  бажамось  кармавтызе  народонть  стямс  тюрема  кинть  лангс, ды  изнямс  те  стака  тюремасонть,  секс, мекс сонзэ, народонть, марто  ульнесь  видечись.              

            

                               

 

 

 

 

 

 

 

 

 

 

2 Романонть   образонзо  ды  художественной  башка  ёнксонзо

2.1 Образной  системась «Покш  ки  лангсо  умарина»  романсонть

«Покш  ки  лангсо  умарина» исторической  романонть  весе  сюжетезэ  панжови   образной  системанть  вельде.

Романсонть  сехте  вадрясто  невтезь  Кузай  Микань  образось. Те  героенть  вельде  поэтэсь  бажи  панжомс  эрзянь  народонть  обуцясо  сехте  вадря  ёнкстнэнь: важодемань  вечкеманть, олячинтень  бажамонть,  вейкень-вейкенень  лездамонть. Неть  енкстнэ  мельстуезь  невтезь  васняяк  секс,  мекс  сынст  канды  покш  вий  марто  велень важодиця  ломанень  превей  цера.  Мика  невтеви романонть эйсэ  вишка пингстэ саезь революционерэнь прявтокс  касомасонзо. Романонть ушодкссо  поэтэсь толкови сонзэ обуцянь башка ёнксонзо. Сон уш  вишка пингстэ невтизе азарсь  обуцянзо:  совсесь  сюпавтнень  пирес, ардтнесь  тувост  лангсо, нолдтнесь  пандо  алов  крандазост.

Кие  се  шкане  содась, што  те «озорникесь»  шкань  ютазь  тееви  покш  ды  кеме  характер  марто  ломанекс. Авторось  тешксты: куш  нужа  потсо  лаки  Вечкезь  велесь, косо  чачсь  ды  кассь  Мика, но  сон  мазый,  ды  ломанензэяк  содыть  эстест  питне:

Ансяк  несак  минек  ёнксонть,

мерят  алкук  мазы  онсо,

сти  морамонь  шожда  толгат.

Паро  слава  пек  васолга

канды  вельть  покш  Вечкезь  велесь

Пичеде  мазыйть  алянок.

Эрьвась  тумо  стявтомс  анок.

Ашо  мацейкс  ванькст  аванок.

Виде  килейть,  прок  лангс  ваномс.

Шумбрат, парт минек  тейтертне

чуро  поны  сельме  кертне [22, 8].

Истямо  приемось  максы  кемечи  авторонтень  невтемс  ловныцятненень, што  те веленть, кона  типичной  эрзянь  народонтень,  может   чачомс  покш  ды  виев  обуця марто ломань. Типизациянь принципесь  тесэ  лезды теемс главной героень виде  образ, невтемс, што Микань  виев  обуцясь те  эрзянь  народонть кеме  обуця.     

Авторось  видестэ  максы  героенть  главной  индивидуальной  ёнксонзо. Сонзэ  валтнэ, тевтне, эрязачись  кортыть  Микань  превейчиде ды смелчиде.

Мика – кузнецень  цера. Кузницясо, прок  горнасо, калявсь  ды  кемекставсь  сонзэ  характерезэ. Тосо  сон  получась  эрямонь  васенце  урок. Эрямонь  а  шожда  ки  ютась  Мика. Васенце  вачкотьксэкс  сонзэ  эрямонь  кинть  лангсо  ульнесь  вечкевикс  тейтерензэ  сюпавонь  экшс  лисемась. Те  стака  вачкотьксэсь  эзизэ  правто  Микань, но  кармавтызе  пек  домкасто арсемс  эрямодонть. Аволь уцяскав эрямось вети  Микань  сенень,  што седеяк  кармась а вечкеме сюпавтнень. Сон бажи  содамс, мекс  истя, Пановонь:

Вейксэ  велень  перть  паксянзо

вете  поймава  луганзо.

Пест  а  муевить  вирензэ.

Колмо  покш  нешке  пирензэ.

Весе  веленть  жо:

Ломанть  пиштевтсь  эрьва  кода,

пешксе  пекень  апак  сода,

кудонь  уштомс  пенгевтеме,

карень  кодамс  ленгевтеме [22, 59].

Микань  чарьксчизэ  таго  аламодо  кепедеви, зярдо  вачо  иестэнть  пек  берякады  Вечкезь  велень ломантнень  эрямост. Мика  а саи Панов бояронть  нинзэ пельде  «гостиництнень». Сюпавтнень  кежень  пандомань тевтне-валтнэ  Микань  эрямо теевить седе  домкакс. Эйкакшпорань  озоровамонть  эйстэ сон ушоды бороцямо  ськамонзо. Церась  кирвастизе  Перовонь  лесопилканть. Те  кежень  пандомась невтизе Микань  политической  лавшочинзэ, сон эзиэе чарькоде  те  ильведевксэнть  ды  снартнесь кирвастемс  Перовонь  омбоцеде. Те  тевенть теемстэ сон понги тюрьмас, косо  вастови Тайнов  марто. Тайнов  панжинзе  церанть  сельмензэ  теезь  тевенть  лангс.  Сон  евтызе, што  пожардонть  мейле  Перов  седеяк  сюпалгадсь:

- Никонор –  а минек  ялга.

Седеяк  ней  пек  сюпалгадсь.

Истя  тон  лездыть  сонензэ?

Ней  страховкас  менсть  кедензэ [22, 126].

Теде  мейле  Тайнов  лезды  Миканень  муемс   бороцямонь  од  средстват. Секскак  Кузай  туи  велестэ  Петербургов, косо сови социал-демократической  кружокс.

Миканень, кода  лия  ломанентеньгак, ульнесть  максозь  ламо  тевть, конатнень  сон  топавтсь  покш мельсэ. Организациянь члентнэнь сюлмась вейс  ялгаксчись, вейкень-вейкень лездамось. Микаяк  тесэ  мусь  эстензэ   ламо  паро  ялгат. Истя, Питерсэ робочейтнень  ютксо улемась лездась Миканень  чарькодемс  вейсэнь бороцямонть виензэ. Авторось  пек   видестэ  невти  героенть  обуцянзо  полавтоманть. Тень  писателесь  кепсевти  сехте  вейке  приемсо. Поэтэсь  пек  чуросто  невти  сонзэ  арсеманзо, рузонь  революционертнэнь  марто  кортамонзо, а  меревикс  книгатнень  ловноманзо.

«Покш  ки  лангсо  умарина»  романонть  башка  ёнксось, косто  ушодови  сюжетэнь  композициясь,  тееви  кавто  ава  марто  Микань  сюлмавоманть  вельде. Мика  васня  вастови  Пурькень  Лушань, мейле  купецень  тейтеренть  Перова  Зоянь  марто. Зоя  вечксы  Микань  сень  кис, што сон вадря ломань  виев  обуця марто, смел  ды  мазый. Но  сынь  курок явовить секс, мекс  виевть  Зоянь ды  сонзэ тетятнень-аватнень  классовой  вановтнэ.

Микань  образось  максови  кода  реалистической, истя  и  романтической  приемтнень  вельде. Народонть  мелензэ-арсеманзо  кис  бороцямось, свал  икелев  молемась, покш  ды  кеме  бороцямось, покш  ды  кеме  характерэсь – вана  эрявикс  ёнкстнэ, конат  теить  Микань  образонть  кемевицякс.

Микань  образонть  рисовамсто  авторось  маштозь  тевс  нолды  романтической  стилень  кой-кона  ёнкстнэнь: героенть  чачонзо  покшолгавтозь  невтеманть, сонзэ  певтеме  виензэ  невтемась  ды  седе  тов. Тезень  эряви  ловомс: мазый  тейтеренть  Зоянь  идеманть, кона  пекстазель  палыця  кудос. Паронь  арсеманть  кис  сон  Миканень  казьсы  сурксонзо.

Теде  башка  образонть  лавшолгавты  се, мекс  авторось  аламо   тарка  явсь  героенть  кода  революционерэнть  обуцянзо  кемекстамонть  невтемантень, сонзэ  мельтнень-арсематнень  панжомантень [23, 60].

Романонть  идейно-художественной  содержаниясонзо  покш   тарка  зани  Пурькень  Лушань  образось. Те  образонть  теемстэ  авторось  тевс  нолдынзе  сеть  эрзянь  моротнень, конатнесэ  ёвтневи  бедной  семиясто  мазый  тейтеренть  уцяскадо  ды  эрзянь  аванть  героической  обуцядонзо.

Поэтэсь  сехте  покш  шнамонь  валсо  максы  Лушань  портретэнзэ, конань  кондят  а  курок  муят  перть  пельга:

Умарь  ютксо  мазы – груша,

тейтерь  ютксо –  Пурькень  Луша.

Шумбраяк, прок  ванькс  од  нешкекс,

киштияк  прок  шожда  мекшке…[22, 10].

Пек  стака  Лушань  эрямозо. Авторось  видестэ  невти  бедной  тейтеренть  эрямонзо. Луша  маняви, но сонсь  моли  сюпавонь  экшс  мирденень. Теньсэ  тешкстави  сонзэ  обуцянть  индивидуальностезэ  ды  лиянь  ёнов  а  молиця  уцясказо. «Расчетонь  коряс» мирденень  лисемадо  мейле  Луша  эзь  муе  часия  сюпавонь  семиясо. Мокшэрзянь  икелень  койтнень  коряс, кулаконь  кудосонть  сон  теевсь  батрачкакс. Пек  ламо  обязанностне  пасте  невтевить  свадьбань  моросонть, конань  Лушанень  моры  ававтось:

- Ох, урьвинекай, дугинем,

церан  каркс  песэ  цекинем,

истя  тонь  исяк  саидизь,

вадрядо-вадрякс  муидизь

васке  чевс  толонь  пувицякс,

скотина  мельга  якицякс…[22, 33].

Седе  тов  ававтось  тонавты  одирьванть, штобу  сон, теде  башка,  неть  тевтнень  тейневель  бойкасто  ды  кунсоловоль:

Седе  бойкинекс  ультяя,

шожда  пух  ёнов  мольтяя  –

тов  ускозевть,  ков  таргатан,

тов  ливтязевть, ков  пуватан [22, 34].

Cюпавонь  семиясо  неть  роботатнень  теезь  ды  вачодо  эрязь,  Луша  пек  берякады  ды  сонензэ  савкшны,  штобу  а  прамс  пильге  лангсто,  салава  кунцемс  ды  нильнемс  вазонь  симдема  ловцосто  тюрят.  Мирдесь  аволь  ансяк  а  заботи   берякадыця  козейкадонзо,  но лови  сонзэ  скотинанть  тощалгадомасо  « чумокс»  ды  чави  эйсэнзэ.  Истя  эрзянь  од  урьвась,  кона  чачсь  бедной  семияс,  аравтови скотинадо  берянь  положенияс.  Неть  сценатне  пек  драматичнойть.