Куторкинэнь «Покш ки лангсо умарина» - эрзя - мокшонь литературасонть стихсэ сёрмадозь васенце роман

Те  стака  эрямованть  ютамодо  мейле Луша,  окойники,  васоди  Мика  марто ды  кадови  сонзэ семиясо верной  ялгакс,  вейсэнь тевень  кис бороцямосонть тееви вадря лездыцякс.  Луша  туи бороцицятнень марто.  Сон эсензэ  теласо  вансты  пулянть эйстэ Микань - восстаниянь  руководителенть  ды  вечкевикс  мирденть.  Теньсэ  авторось  невти  эрзянь  аванть  героизманзо,  кона  вечкемань  кис  теи  подвиг.

Лушань  образось  пек  лиричной.  Поэтэсь  тень  теи  сень  вельде,  што  муи  изобразительной  эрявикс  средстват,  эрявикс  обстановка.

Лушань  образось  улевель  бу  седеяк  сюпав,  бути  авторось  невтевлизе  аванть  потмоёжонзо.  Примеркс,  ярмункасо  сон, «прок  сулей»,  яки  Мика  мельга.  Но  мезе  моли  седейсэнзэ,  мезе  тенень  сонзэ  кармавтызе,  поэтэсь  тень а невти [18,  107].

Лушань  образось  ашти  валдо тештекс,  конань  лецтязь,  паро  мель  рашты  мештезэть.  Истятнэ  а  стувтовить,  сынст  вийсэ  кемексты  эрямось. 

Ламонь  таркасо  авторось  невти  Остань  Лебонь  образонть.  Лебо -         Микань  крёстной  тетянзо.  Сон  виев,  превей,  смел.  Вана  Лебо  ярмункасо,  народонть  ютксо.  Тесэ  сон невтьсы  виензэ,  зярдо  иредезь  купецесь  Перов  кармась  бушовамо  [23, 55].

Лебо  сеске  се  купеценть

Капотизе  беремс,

Вельть  кувака  виев  кедьсэ

Кепедизе   верев  [22,  201].

Седе  тов  Лебо  тееви  Микань  вадря  лездыцякс.  Сонзэ  кудос  кармасть  пурнавкшномо народонь  промкстнэ.  Сон кандтнесь  Миканень  эрявикс  кулят  вирев  кардонс,  косо  Мика  эрясь  пожардонть  мейле.

Романсонть  истя  жо  вадря  характеристика  максозь  Нужань  Савконень,  бедной  пономарентень,  конань  кудозо  попонть  усадьбанзо  каршо.  Савко  комсь  иесэ  кадовсь  тетявтомо.  Калмамонзо  мейле  цёрась  получась  наследства:  пандомс  тетянзо  кис  весе  недоимкатнень,  но  сонензэ  а  мейсэль  пандомс:

Недоимканть  кисэ  керизь,

Натой  веть  пургасть  киськстэнзэ.

Савко  мода  порсь  виськстэнзэ,

Но  мейле  тень  эйс  тонадовсь.

Ведь  расчётось  теке  кадовсь.

Кемень  иень  истя  ютамс

Нужань  Савконь  киськенть  лутасть.

Алкукскак  уш  эрьва  мейстэ,

Но  сех  сеетьстэ  илейсэ [22, 152].

Ней  Савко  чави  баяганть,  эри  пек  беряньстэ,  ярсыяк  марчонь  кшиде.  Кардазонзо  зярдояк  ракшат  эзть  совсе.  Теде  корты  се,  што  тозонь  кайсь  кумажава  пиже  луга,  весе  Савконь  сюпавчизэ.

Но,  весе  тень  лангс  апак  вано,  велень  эрицятне,  эсензэ  кондят  ломантне: «Савконь  опытнойкс  ней  ловить,  превень  кисэ  тензэ  совить.»

Кодомо  бу  стака  тев  аволь  савт  теемс  народонтень,  сехте  эрявикс  шкастонть  свал лисиль  юткстост  ломань  те  тевенть топавтомо.  Истя,  зярдо эрявсь  пурнамс митинг,  народонть пек маштозь пурнызе Пурькень  Маське.  Сон сась  базаров минень-сюнонь  микшнеме,  но  ломантне  чарькодизь  сонзэ:

Пек  ламо  ломанть  пеельсть,

Маськес  рожодомкшность.

Аленть  перька  эрьва  велень,

церат,  ават  промкшность  [22, 201].

Романонть  нилеце  пелькссэнть  тюремась  пачкоди  текшос.  Сюпавтне  кармасть  содамо  восстаниянть  кепетемадо  ды  ушодсть  ломантнень  мельга  следямо.  Теньсэ покш  лезэ  канды бояронь кучерэсь  Карпа,  кона  марясь,  што зярыя ломанть Пановтне  арсить  ледеме:

Се  вестэнть  сон  эзь  удо,

якась   эрьванть  кудос

теде  кулянь  пачтеме.

А  не,  Карпонень  кемезь,

вирев  тукшность  эрямо,

карекс  ленгень  керямо…

Кияк  сынест  эзь  понго,

кияк  тюрьмав  эзь тонгов  [22, 19].

Покш  лезэ  восстаниянть  анокстамос  кандсть  аватнеяк.  Истя,  зярдо  ошсто  эрявсть  пачтемс  литература  ды  лия  эрявикс  тевть,  теньс  кундась  Югань  Вика.

Произведениясонть  покш  тарка  явозь  Петербургской  социал-демократической  организациянь  членэнтень  Ростислав  Тайновнень.  Васенцеде  лоныцясь  вастови  Тайнов  марто,  зядо  сон  ульнесь  студентэкс,  кона  Нижней  Новгородсто  молемстэ,  буто  кельме  ведте  симемс  совась  кузницяв,  косо  роботась  Кузай Яков  цёранзо марто [23, 57].

Вана  кодамо  портрет  максы  авторось:

Цёра,  кона  свал  мизолды-

будто  покш  мельспаро  тензэ.

Шоколадонь  прок  сельмензэ.

Сонзэ  кочксезь  эрьва  валось,

лисьмапрясто  теке  валовсь  [22,  16].

Омбоцеде  Тайнов  невтеви  тюрьмасо,  косо  вастови  Мика  марто.  Микань  кевкстеманзо  лангс: «Мезень  кисэ  тонсь  пекстазят?»  Сон отвечи: «Мон  сень  кис,  што  яла  бажан  зярс  а  мадить  калмс  ловажан,  кол  инязоронть  каямо.»  Седе  тов  минь  карматано  содамо,  кода  тюрьмасто  лисемадо  мейле  Тайнов  эри  то  велесэ,  то  ошсо.  Сонзэ  тевензэ-валонзо  коряс  эрзянь  велетнева  теевить  революционной  кружокт.  Авторось  а  невти  Тайновонь  восстаниянть  шкасто,  ды,  минек  койсэ,  те  а  эрявияк.  Сонзэ  тевензэ-валонзо  тесэ  топавты  Кузай  Мика,  кона  целанек  кассь  сонзэ  мелензэ-превензэ  коряс.  Седе  тов  минь  Тайновонь  вастсынек  Рузаевка  ошонь  рабочейтнень  ютксо,  конат  истя  жо  кепедсть  тесэ  восстания.  Сон  тескеяк  ютавты  покш  агитационной  робота.

Романонть  образной  системазо  теезь  контрастонь  приёмонть  вельде:  васняяк  персонажтне   явовить  классовой  признаконть  коряс.  А.Д. Куторкин  снартнесь  домкасто,  психологической  анализэнть  вельде  невтемс  классовой  врагонть  лагеренть,  ливтемс  эрьва  кодамо  сословиянь  типть.  Главнойтне  ютксост - Панов  помещикесь,  Перов  лесопромышленникесь,  Попов  купецесь.  Сынст марто ве  киява молить  урядникть,  полицейской чиновникть,  попт,  приказчикть ды  лият.  Неть           персонажтнень невтемстэ   писателесь  топавты реализмань  принципенть вешнематнень,  истя  жо,  кода  положительной геройтнень  невтемасояк.  Теке  марто  вейсэ,  сон  ливти   икелев  сатирической  гиперболизациянть,  конань  вельде  тешкставить,  истят  сынст  обуцянь  ёнкстэ,  кода  каштанчись,  классовой  авечкемась,  покшкавтнемась. Лангс  ваномс  неть  ломантне  культурнойть,  алкукс  жо – чаво  потмот, кежейть, ялгаксчинь  а  содыцят. Сатирической  гиперболизациясь  васняяк  саеви  купецтнень  невтемстэ. Вана  кодамокс  несы  ловныцясь  Поповонь  ярмункасо:

Те – Попов  Евсей  Фролович,

сон - почтонь  инязор.

Секс  киньгак  ломанькс  а  лови,

Лачокс  лиссь  конязо.

Начко  бобат  прок  сельмензэ:

пштить, велицят, наловт.

Пек  савты  кеж  се, кода  вети  прянзо  Панов  помещикесь. Сонзэ  эйсэ тунь  арась  седей  ежо. Пановонь  невтемстэ  авторось, кода  эрьва  неявикс  персонажонть  невтемстэ, муи  истямо обстоятельства, конась путсы  сонзэ  характеристикантень  остатка  точканть ды  теде  мейле тензэ  а  мезе  поладомскак.

Классовой  врагонь  персонажтнень  ютксо  сехте  покшось  – инязорось. Писателесь  невти  сонзэ  кода  конкретной  тип  конкретной  обстоятельствасо. Николай II  якась Саровской Монастырев. Самай те  шкастонть сонзэ несы  ловныцясь Микань  сельмсэ. А.Д. Куторкин  сайсь  прием: малав  весе положительной  персонажонзо арсезь  эсензэ  пельде, отрицательнойтне – малав  весе  конкретно-историческойть (Панов, Перов, Попов, Николай II, Витте). Хоть  аламо тарка максы инязоронтень  романистэсь, Николай II  сови  мельс-превс:

Тонань  мельга  ки  моли,  тень

хоть  а  сырежди  конязо,

но  лемесь покш – инязор.

Портрет  лангсто  валгсь  прок, вельмезь,

ожо сакалнэ, сэнь  сельме,

ванькске, мазыйне  ды  однэ,

сон  сюкпрят  кайси  народнэнь.

Вадрясто  романсонть  невтезь  кулаконть  Каргай  Михеень  образоськак. Сон  пачк  чары  народонть  перька. Велесэ  ломантнень  ютксо  Михей  машты  эрямо.Весе  те  сюпавчинть  пурназь, хозяйстванть ёрокчинь содазь  ды  салазь-колазь, мезеяк  лангс  апак  вано, эсензэ  пелев  ускозь.

Но  те  сюпавчинтень  бажамось  кармавтызе  казякадомо  ломаненть  седеензэ. Кудосост  пачк  молить  севномат, аватне  аштить  цератнень  пильге  ало, сынь  пек  ламо  важодить, теке  уреть.

Велень  чопода  народось  кирдсь  мелест «пазонь  ломантненьгак». Отец Увар  прянзо невти  народонь  вечкицякс, оймень  идицякс. Тевсэ  жо  сон  народонь  манчиця, сюпавтнень  марто  вейсэ  трудицянь  лепштиця. 

Сон  кармавты  Спирянь  революционерэнть  мельга  ваномо.  Отец  Увар  эсь  чачонзо  кекшизе  пазаванть  экшс.  Сон, «народонь  оймень  идицясь»,  макссь  Спирянень  револьвер  трудицятнень  леднемс.  Сон  свал  ульнесь  сюлмавозь  аволь  ансяк  велень,  мик  ошонь  сюпавтнень  мартояк,  лездась  инязоронь  властентень.

«Покш  ки  лангсо  умарина»  романсонть  авторось  невти  сюпавтнень  служицясткак,  конат  бажить  арамс  ве  рядс  азорост  марто.  Истя,  Пановонь  имениянзо  управляющеесь  Взоров  теке  киска  кайсеви  народонть  лангс.  Сон  якась  кудова  каявксонь  пурнамо,  сайсь  ломантнень  меельце  сускомаст.  Бути  кинень  а  мейсэ  ульнесь  пандомс,  пикссэ  ливтилизе  скалост.

А  вана  полтцмейстерэсь  Самохвалов  эри  седе  ёжовсто.  Сон  народонть  граби  вяткасо,  кода  казнокрад.  Самохвалов  а  визди   саемс  помещиктнень  ды  купецтнеь  зепстэяк.  Весе  отрицательной  образтнэнь  невтемстэ  А.Д.Куторкин  саи  художественной  средстват,  конат бу  тешкставлизь  сынст виень ды  оймень  лавшочист.

Сюпавтнень  невтемстэ  авторось  нолды  ильведевкс.  Сон  сонськак  эзизе  редя,  кода  сюпавчинть  сялдомс,  весе  оймсэ  кармась  идеме  «менельстэ  кашань  учицятнень»,  лиякс  меремс  нузякстнэнь.  Секскак сон бажи  ловыцянть кемевтемс:  сюпавчись-кажо.  Инексчись,  минек койсэ,  ломаненть мазылгавты  аволь ансяк ярмаксо,  потмо ёндояк.  Эдь сюпавось,  зярдо седейсэнзэ  кеняркс,  кши сускомодо а арси.  Тесэ,  А.Д. Куторкинэнь  романсонть,  неть  мельтне-арсематне  ёвтавить  мекевланк.           

              

                

2.2 «Покш   ки  лангсо  умарина»  романонть  художественной башка  ёнксонзо

«Покш  ки  лангсо  умарина»  романсонть  улить  новаторской  произведениянь  енкст. Те  произведениясь  кепеди  мокшэрзянь  исторической  романонть од  ступеньс  секс, мекс эйсэнзэ ёвтневить аволь ансяк вымышленной   действият, но  исторической  содавикс  ды  реальной  ломаньде, молить  алкуксонь событият, конатнень мельсэ  кирди народось  ды  конат налксесть сонзэ эрямосо кодамояк  роль.

А.Куторкинэнь  романсонть  арасть  автобиографической  материал. Секс «Покш  ки  лангсо  умаринань» авторось  седе  келейстэ  невти  исторической  эрямонть, романсонть  седе  ламо  творческой  фантазияськак.

«Покш  ки  лангсо  умаринасонть»  истя жо  ламо  документальной  материал, фактт, конатнень  невти  исторической  наукась.

А.Куторкин эсензэ  произведениянь геройтнень  марто  невти  исторической  реальной  ломанень  образт, конатнень  судьбаст  сюлмавозь  произведениянь  геройтнень  судьбаст  марто. Алкуксонь  образтнэнь  ютксо  минь  вастано  Байкузовонь – 1905  иестэ  «Рузаевской  республикань»  яволявтомань   читнестэ  теезь  Распорядительной  комитетэнь  председателенть.

Романсонть  художественна  невтезь  истоической  алкуксонь  зярыя событият, конатне  сюлмавозь  неть  ломантнень  марто.

«Покш  ки  лангсо  умаринасонть»  видестэ  невтевить  рузонь  васенце  революциянь  исторической  событиятне Аратовской  ды  Алатырской  уездтнесэ, косо  моли  романонть  главной  действиясь. Авторось  а  бажи  ётнемс  башка  велетнева  революционной  выступлениятнень. Поэтэсь  вейсэнди  сынст  вейс, ломантнень  образост  вельде  невти  аволь  ансяк  крестьянской  движениясо  вадря  ёнкстнэнь, но  и  невти  робочей  классонть  марто  лавшо  сюлмавкстнэнь – сехте  пек  помещикень  имениянь  громамсто.

Романонть  башка  енксокс  ашти  образной  келесь, кона  малавикс  народонь  кортамонтень. Ёвтнема  лувсонть  сеедьстэ  вастневить выраженият, конат  марявить валмеревксэкс, сынь  буто  саезь  устной  творчествасто, алкукс  жо  сынст  сермадынзе  А.Куторкин  сонсь.  Сынст  эйсэ  свал  ули  домка  арсема, художественной  мазычи. Ламо  афоризматне  чарькодевтить  народонь  беднойчинзэ:

Ки  нарьгамс  нужантень  максозь,

кинь  ломанькс  а  путыть,

сень  од  шкась  варяв  башмаксо

покшсто  касомс  юты…

Вастневить  произведениясонть  рузонь  кортамоткак. Сынь  саевить  секс, штобу  парсте  невтемс  ярмунканть, седе  парсте  тешкстамс  картинанть  полифонической  смустензэ. Рузонь  кельсэ  кортамотне  вастневить  кавксть-колмоксть  ды  эрьва  разонть  сынст  обуцяст  невтемань: рузонь  кельсэ  корты  циркев  тердицясь  ды  истя  жо  книгань  микшницясь [21, 68].

Ёвтнема  лувонтень  авторось  домкасто  совавты  устно-поэтической творчествань  традициятнень. Писателесь аволь ансяк саи башка ёнкст фольклорстонть  ды  сынст кувалт  тешксты эрьва кодат событият, сон сонсь лаци  сюжет, конат молить  устной  народной  творчествань  произведениятнень ёнов, но конат  зярдояк  сонзэ  эйсэ  эзть  вастневе.

Авторось  тень  теи,  штобу  седе  домкасто  панжомс  народонть  эрямонзо,  эштё  весть  ёвтамс  вал  народонть  обуцядонзо.   Устной  народной творчествань  традициятне  кепедить  произведениянть  национальной юронзо,  панжить романонть поэтической мазычинзэ ды  художественной  виензэ.  Тень  весе  мельсэ  кирдезь,  А.Д. Куторкин  эсь  художественной  проиведениязонзо  совавты  истят ёвксонь сюжет: «Кода  цёковось  тонадсь морамо», «Калонь кундыця ды  ведявань  тейтерь».  Васенцесь - цела  драматической  поэма.  Романсонть  сонзэ  ролезэ  сеньсэ,  што  сон  кармавты  ловныцянть  варштамс  удалов,  кезэрень  шкантень.  Раянь  образонть  вельде  чарькодеви,  кодамо  вий  максы  ломанентень  кемемась  ды   вечкемась.  Эрясь  зярдо  бути  кежей  инязорава.  Ульнесь  сонзэ  колопказо  Рая.  Эзь  сато  весть  Раянь  виезэ,  ды  сон  сельмс  ёвтызе  тензэ  весе  кежензэ.  Инязоравась  кармавтызе  слуганзо,  штобу  Раянь  келензэ  ды  кедензэ  керямс,  сюлмавтызе  кутьмерезэнзэ эйкакшонзо,  максовтсь тензэ чаво  мешок ды кучизе  сонзэ мирэнть келес якамо.

Раянь  образось  пек  малавикс умаринань  образонть  марто.  Сонзэ  эйсэ  неяви  секе  жо  муцямось,  секе  жо  стакачинть  кирдемась.  Сынст  вейсэнди  эрямонть  вечкемась  ды  олячинть  самонтень  кемемась.  Драматической  поэзиянь  домкачи  путозь  сценантень,  конасонть  Рая  правтызе  эйдензэ  ведьс, ды  сонзэ  друк  кассть  кедензэ,  штобу  таргамс  эйденть,  появась  келезэ.