Петр Иванович Левчаев – мокшень содаф прозаик

    Содержаниясь 

    Ингольдень  вал

    1. Петр Иванович Левчаев – мокшень содаф прозаик

    2.1. П.И.Левчаевонь иттненди лемтьф произведениянза

    2.2. Мяльхть-арьсемат Левчаевонь «Кярьмаз» сборниконц колга

    Мекольдень  вал

    Тевс  нолдаф литературась 
 
 
 
 
 
 
 
 
 
 
 
 
 
 
 
 
 
 
 
 
 
 

                                                  Ингольдень вал

    Литератураньконь  идейно-эстетическяй кемокстамаса творческяй лама вий путсь Петр Иванович Левчаев. Сон сась литературазонк 1929 кизоня и нолдась лама книга мокшень и рузонь кяльса. Эсь очерконзон, азксонзон, повестензон мархта сон занясь няевикс васта мокшэрзянь прозаса и арась содаф писателькс.

    Петр  Иванович Левчаев седишкава кельгсы ломанть, седи-ваймокс эряй-ащи эсь народонц марха, фалу тонафнесы сонь ётай пингонц, мархтонза марса строяй тячиень шить и, пяк марямок сянь, мезе стамсь современностсь, эсь талантонц педа-пес и фалу макссесы од, тяниень ломанть духовна оду шачемань и касомань-кемокстамань аф тёждя и пяк итереснай кинц няфтеманцты, мокшэрзянь народть оду шачеманц и мазыдонга мазы эряфть няфтеманцты. 

    Сонь  повестензон, азксонзон содержаниясна  сявондеви эряфста, конань сон внимательна  тонафнесы, конань эзда кочкси поучительнай, крхка и интереснай историят. Писательть событиянза, фактонза и ломаненза няфнесазь эряфть сложнайшинц, конаса фалу сяськонди воляв ломанть трудовой эрьгац, - ломанть, конанди аф пелькст кодамакельк сталмотне.

    П.И.Левчаев  ёрай народть эряфста сембода  типическяй  явлениятнень няфнемс  контрастно-образнайста, тяса сон мушенды  художественнай выразительностень  вии средстват и макси народть эряфста аф юкставомшка драматическяй картинат, конатнень вельде пяк лац няеви советскяй стройть пингста од эряфонь радостсь.

    Писательсь содасыне эряфонь явлениятнень сложнайшиснон, аф ётни оржа конфликттнень вакска и аф тиенди искусственнай ситуацият, одсь и цебярсь сонь произведениянзон эса фалу сяськонди, стане, кода шобда веда меле фалу варьхмотькшни и стяшенды валда шись.

    П.И.Левчаевонь задачац воспитандамс од ломаттнень стане, штоба синь кельголезь эряфса цебярть, шачема ширть мазышинц.

              

                      1. Петр Иванович Левчаев – мокшень содаф прозаик 

    Сон шачсь Мордовскяй АССР-нь Зубово-Полянскяй  райононь Паронза Велеса мокшень  трудовой семьяса. Начальнай школать аделамда меле сон тонафнесь крестьянскяй од ломанень Анаевскяй школаса, а сяльде Саранскяй рабфакса и тяка пингть пачфнесь кулят мокшень газетав, 16 кизоса печатлазе васенце стихотворениянц, а 23 кизозонза самс нолдась веете книгат: «Ушеткс», «Кяж», «Сяпи шит», «Расскаст», и «Даволхт».

    1934 кизоня П.И.Левчаев примафоль СССР-нь Писателень союзу, и тя сонь кошардозе нинге сядонга пяк тонафнема, и сон поступась Саранск ошень пединституту, сяка пингть кармась тонафнема художественнай мастерствати русскяй классикнень и советскяй мастерхнень произведенияснон эзда. Пяк кельгозе и народть устнай творчестванц, тонафнесь кяленц мазышинцты. Тя лездсь П.И.Левчаевонди нинге 30 кизотнень арамс няевикс вастс мокшень писательхнень ёткса.

    Лама  няйсь эряфсонза писательсь, панжадонь  потмот можна азомс, што сон аф тёждя судьбань ломань, но Пётр Иванович эряфонь кельги и Отчизнань патриот. Эряфть инкса мялензон мархта сон верондазь моли эсь кинц эзга и формировандави кода писатель, кона машты эряфть главнай линиянц няема и сембе кальдявть и лимоть-сюнеть меккятть яфиемонза. Самай тя и валдопнесыне сонь творческяй вешендеманзон и макси оцю права, штоба кулхцонкшнемс сонь вайгяленц. Тейнза уле мезе азомс, и сон машты эсь лувиензон мархта корхтама панжадонь седихть, интересна и стане, штоба кеподемс синь подвигонь тиема.

    Петр  Иванович Левчаевонь седиец фалу шави фкакс эсь народонц оцю седиенц мархта. Самай сяс писательсь сембе сяда крхкаста сотцесы эсь народонц и эсь современниконц характеронц и сёрматкшни седиень таколфты произведеният.

                 
 
 

                 2. П.И.Левчаевонь иттненди лемтьф произведениянза

      Тячи сембода лац содаф: тяфтама ломаттнень, кодамокс ульсь Левчаев, «муворшисна» фкяль — талантсна, эряфть, аф кода кошарттядязь, а кода тонць шарьхкодьсак, няемац, эсь народцень инкса пичедемась-ризнамась, сонь цебяренц инкса кенярдемась, сталмонзон-ёшмонзон машфтомаснон инкса эсь прянь аф ужяльдезь тюремась, пара тевс прафтомась. 1934 кизоня, мзярда мокшэрзятненди максфоль Республика, улема,.ваймонь весть таргазь серматфоль Петр Левчаевонь «Радостсь пяк оцю» стихотворенияц:

                       О, конашка   радость,

                       Шиське  бта    кшти. 

                       Кизот, теень аэость,

                       Мезень тячи шя? 

                       Мес тяфта ичкизи

                       Мялезе тусь вяри?

                       Ков сон тяфта  лии, 

                       Ков сон тяфта  кяли? 

                       Содави ли мезе

                       серьгядсь мяльть ичкизи?

                       Республикась Мокшэрзянь, 

                       Областть 5-це кизоц! (Левчаев,            1936:26) 

    Ланга ванозь, и эсь народонцтывок, и  эстейнзовок Петр Левчаев ерась няемс-анокламс сянь, мезе и сембе поэттне. «Еран эрямс» стихотворениясонза тянь колга авторсь сермады: 

         Кода еран, штоба  эрямс иинге                      

         Лама шит и лама кемотть киза,

         Няемс эряфть эстонь мазы пингонц, Коза тяни ладяф виде       кизе! 

         Кода еран эрямс  и работамс, 

         Штоба ся шись удель  сяда таз, 

         Штоба эстонь марлю садга ётамс, 

          Штоба мараюсь  меньге марьса казель». (Левчаев, 1936:34) 

    30-це  кизотнень мокшэрзянь литературась и башка писательхне, кда верондамс нинге аф пяк  кунардонь критикненди, бта аньцёк сянь  содасть, што латцесть гимнат 1917 кизонь революцяти и коллективизациять етафтоманты. «Сокороль»  кле, эста марнек литератураньке. Сокорши ульсь — тявок виде. Но литературасонк  эстовок, коса кяшфста, коса апак кяшть, няфнесть пря ся вешфкене-пичефкене, конат пичетьфтихть эсонк тячивок.

    Петр  Левчаевонь марнек поэзйянц колга нинге аф пяк кунардонь критиконьке, птцтай крёзонь   каязь, сёрмадсть: сонь   произведениянзон    эса «сембось пачк суваф кулачествать кода классонь машфтома мяльса и тянь вельде сплошной коллективнзациянь етафтомать колга     арьсёмаса».

    Аф  сембонь, ялгат, примасть тя   «арьсематнень» эзда седи ваксозонт,   сяс мес     «Историясонк» Левчаевонь колга, васендакиге сонь поэзиянц квалма, азф аньцек пяле видеши: коллективизациять колга сонь стихонзон эса азф, и лама, вов «кулачетвать машфтоманц» колга  аш фкяок стихотворения. Поэтть сембе комсь стихотворениянза азондыхть ся пингонь тефнень, нолатнень н ударникнень колга, лиякс мярьгомс, сянь колга, кода види-сокай ломанць васьфтезе колхозу сувамать, сянь колга, мезе ломанць арьсесь «марса ярхцамать-покодемать» колга. Стихонзон ёткса аф кржа стамдовок, конатнень колга ся пингонь критикаське мусь туфтал мярьгомс; 
«сяда поздняй серматф стихонза..: сяда товга кармайхть кирдема пяк эрявикс значения».. 

    Мезень  колга азонды Петр Иванович Левчаевонь поэзияц? Сон пяк метафоричнай. Вов, кепотьксонди, «Васедема» стихотворенияц. Ланга ванозь, васедема стирь мархта. Мокшенъ стирь мархта — тя детальсь мянь кафксть китькстаф. Но стирь мархта васедемась—тя аньцек «форма», кода мярьгондихть критикне. Стихть марнек попоэтикац образонза, метафоричностец, пялес шарьхкодеви смузьшиц — сембось корхтай  сяда оцю васедемань колга. Тя васедема ся пельксшйть мархта, кона даволкс ушедсь эста валгома нароттнень и ломаттнень лангс. Вдь аф стак «толгавсь» кошярясы церать нилемс сизефть, варжакстомс меки и фталу, сяда алу комафтомс пряцень. Символкс касондыхть стихотворенияса лия обрасневок: пяк мазы «мокшень стирсь» — тя сонць мокшэрзянь народсь сяка жа смузьшиц «аф шава виртьке», а стирть-цёрать вельхксса чильняй нармонць –тя сонць поэтсь, ся пингонь эряфть вельхксса пелькс «даволхнень»  няисна-шарьхкодисна. Аф стак поэтсь аделасы стихотворениянц, метафора потмос кяшф смузьшиса:

                                                 Ой, аф азса валонц стирть:

                                                 Тинць  содасть кельгинь валть

    Тя  «валсь» тейнек няевома-шаръхкодевома ушеткшневи аньцек тяни, лама пингонь етазь.

    И, улема, аф стак Петр Левчаевонь ламонц стихонзон эса максфт эряфть колга  «думай-арьси» геройхть, а сидеста авторсъ сонць кошярясыне лувиензон «арьсема», маштома «кельги валонь содама». 

    «Даволхт» сборникть ушетксстонза пяледа ламонцты молемс стихне «валфт валда валса», аф шуроста зсост васьфневи цють ли аф «кштимань» ритмика. Сборникть пенцты маласькодозь, эвондакшнихть «цильфт», нильгонь «стака кепсемат», «толгафт-месть, «цят моли» якшапт, «шаржу тялот» и лия «сталмонь канды» метафорическяй обраст.

    Вов нинге фкя стихотворенияц — «Тялонь  зорят», конань эса «цят моли якшапнень каршес тюремать ззда поэтсь маряй «ламбамаши»:

                                          Сембось уды акша вельхтям ала

                                           Якшам Атясь алгак

                                           ой, аф пелян эздот, шаржу тяла;

                                          Лешу панттнень лангс тячи куцян...

                                           Тяла, шаржу! Марян эздот ламбам,

                                        Тяла, шаржу! Келькса фальцень- пухть.(Левчаев, 1936:23)

    Левчаевонь  лемоцка — аф пели ломанень лем: Петрсь греческяй кяльста етафневи кода «кев». Метафорическяй смузьшида  пяшкотьфоль псевдонимоцка — «Пилев». И афкукс, поэтть Петр Левчаевонь поэтическяй «пилец» малатфоль народнай эряфти, народть вешфксонзонды-пичефксонзонды, думонзонды-арьсеманзонды. Сяс тяфтамольхть героензовок. Кда ашезь сатне эсь арьсемашисна локасна, поэтсь «кошярязень» арьсема сонць, кода, кепотьксонди, Ванькань — «Ков молят» стихотворениястонза героенц:

                                       Ванька! Мес пяк нолдаф нярце?

                                            Мезень колга пичедят? —

                                            Али козякодомс мяльце

                                            Мезе пичедезь тият? (Левчаев, 1936: 25)

    Колхосненди, марстонь тевти Левчаев терди, но терди… арьсезь, аф локшеса каяезь, кода сидеста улендсь 30-це кизотнень. Ся пингонь вятиеньке коллгективизациять етафтомста инь оцю пелькс няйсь «классовай врагть ззда, «Классовай  врагокс» лемтьфтольхть аф аньцек сят, кие шамань апак кяшентть тюрсь колхоснейь каршес, но и ламонц види-сокай ломаттневок, конат аф фалу лац-ряц шарьхкодезь, мезе стамсь коллективизациясь. Тяфтане лемтьфтольхть «лодырькс» и «рвачекс», «классовай врагти лездыкс». Петр Левчаевонь стихонзон эса колхоснень каршес тюрихть аш ёфси. Сембе сонь сборникоц, а лиякс мярьгамс — сембе сонь поэзияц лемтьф куфтолды-кафтолды ломаттнень колга арьсематненди. Тяфтама лятфнеф ни Ванькась, тяфтама и Васькаське — «Коса тяфта» стихотворениять героец. Тяфтамот поэтть сембе героенза. Ламонцнень эздост поэтсь лемнесыне «пянакуд лангса ащикс». И «Даволхт» сборникть лувомста эсьотям стякшни кизефкс: а мес шачендыхть «пянакуд лангса ащихне»? И кали ни тяфтапне афкукс пяк ни пелькстольхть колхосненди и революцияти?